Elordada qoǵamdyq kóliktiń 17 baǵdarynyń kestesi uzartyldy

ASTANA. KAZINFORM – Astanada jolaýshy tasymaldaıtyn 17 baǵdardyń, ıaǵnı №3, 8, 9, 10, 13, 15, 17, 18, 20, 23, 27, 30, 32, 35, 44, 59, 84 keshki ýaqyttaǵy kestesine aınalymdar qosyldy, bul kórsetilgen baǵdarlardyń jumys ýaqytyn uzartýǵa múmkindik berdi. 

Elorda ákimdigi resmı saıtynyń habarlaýynsha, qazirgi ýaqytta Astana qalasy qoǵamdyq kóliginiń jumysy saǵat 06:00-den 23:30-ǵa deıin júzege asyrylady. 

CTS kompanııasynyń málimetinshe, saǵat 23:30 baǵdardyń sońǵy aıaldamalarda jumys ýaqyty – tolyq aıaqtalatyn ýaqyty. Mysaly, sońǵy aıaldamalarynyń birinen baǵdar saǵat 21:50-de shyqsa jáne marshrýtty júrip ótýine 1,5 saǵat ýaqyt ketetin bolsa, onyń kelesi sońǵy aıaldamadaǵy jumysy saǵat 23:30 aıaqtalady. 

– Baǵdarlardyń júrý kestesi men aınalym ýaqyttary ártúrli ekenin eskere otyryp, sońǵy aıaldamalardaǵy baǵdarlardyń jumysy ártúrli aıaqtalatynyn eskerý mańyzdy. Turǵyndardan sapardy josparlaý kezinde osyny eskerýdi suraıdy. Jaqyn arada túngi baǵdarlar iske qosylady. Olardyń iske qosylý kúni týraly qosymsha habarlanady. Qoǵamdyq kólik qyzmetin jaqsartý boıynsha jumystar jalǵasady, - dep habarlady kompanııa ókilderi.

Eske sala keteıik, buǵan deıin Astanadaǵy qoǵamdyq kólik parki jańa 15 avtobýspen tolyqqanyn habarlaǵan edik.