Elordada qoǵamdyq kólikterde bıletsiz júretin jolaýshylarmen kúres bastaldy
ASTANA. KAZINFORM – «Jańa adamdar» Jastar qozǵalysy «Zaıtsam Net» azamattyq naýqany arqyly elordadaǵy avtobýstarda jolaqy tólemeıtin jolaýshylarǵa eskertý jasap, shara qoldanatynyn habarlady.
«Zaıtsam Net» jobasynyń kóshbasshysy Álisher Nýsanbaevtyń aıtýynsha, jyl basynan beri Astanada qoǵamdyq kólikterde bıletsiz júrgen 124 myńnan astam jolaýshy anyqtalǵan. Elordalyq PD qyzmetkerleri 5 614 azamatty ákimshilik jaýapkershilikke tartyp, jalpy somasy 41 mıllıon teńgeden astam aıyppul salǵan.
Ár apta saıyn atalǵan top músheleri reıdterge shyǵyp, jolaqysyn tólemeıtin jolaýshylardy anyqtap, túsindirý jumystaryn júrgizedi. Tólemegen jaǵdaıda olardyń vıdeosyn áleýmettik jelige jarııalamaq.
«Qurmetti, jolaýshylar! Qoǵamdyq kólikke mingen árbir deni saý adam jolaqysyn tóleýden jaltarmaýy kerek. Biz komandamyzben qoǵamdyq kólik tártibin saqtamaǵan adamdarǵa túsindirý jumystaryn júrgizýge daıynbyz», - dedi Álisher Nýsanbaev.
Eske sala ketsek, elordanyń Qorshaǵan ortany qorǵaý jáne tabıǵatty paıdalaný basqarmasy Astanada kóktemgi deratızatsııa jumysyn bastaıtynyn jazǵan bolatynbyz.
