Elordada «Kóshpendiler Álemi» halyqaralyq etnofestıvali ótip jatyr
Etnofestıvalge elimizden bólek, Túrkııa, Ázerbaıjan, Bolgarııa, Iran, Ońtústik Koreıa, Qyrǵyzstan, Mońǵolııa jáne Ózbekstan elderiniń ókilderi qatysýda.
Osymen ekinshi jyl qatarynan ótip jatqan aıtýly sharanyń maqsaty - kóshpendilerdiń tarıhyn jáne mádenı murasyn nasıhattaý, ulttyq salt-dástúr men kóshpendiler ónerin jańǵyrtý. Sondaı-aq tarıhy kóshpendilikpen baılanysy bar memleketter arasyndaǵy mádenı qarym-qatynasty nyǵaıtý.
«Etnofestıval respýblıka boıynsha osymen tórtinshi ret, al elordada ekinshi jyl qatarynan uıymdastyrylýda. Kóshpendilik - bul bizdiń ótken tarıhymyz. Maqsatymyz - ótkenimizdi jańǵyrtý. Bul biz úshin jáne bolashaq urpaq úshin mańyzdy. Sondaı-aq, atalǵan sharanyń tárbıelik máni zor. Sebebi, bul jerde ulttyq qundylyqtarymyz, dástúrimiz ben ónerimiz dáripteledi. Sonymen qatar, etnofestıvalge shet memleketter ókilderi qatysýda. Bul óz kezeginde elimizge týrıster tartýdyń bir joly. Festıval qatysýshylaryna sáttilik tileımin», - dedi QR Mádenıet jáne sport vıtse-mınıstri Eldos Ramazanov.
Onyń aıtýyna qaraǵanda, elorda turǵyndary men qonaqtary festıval barysynda kóshpendiler sherýi, kásibı sadaqshylar jarysy, kókparshylar men búrkitshilerdiń saıysy, jekpe-jek jarysy jáne shabandozdar ónerin tamashalaı alady.
«Festıval qonaqtarynda kóshpendilerdiń ómir saltyna, tarıhyna úńilý múmkindikteri bar. Munda kelgen árbir qonaq etnomádenıettiń kópqyrlylyǵyn sezinip, halyqtyń ómiri men salt-dástúrleri jáne kóshpendiler turmysymen tanysa alady. Jáne de otandyq qolónershilerdiń sheberlik sabaqtary uıymdastyrylady. Atap aıtqanda, kıiz basý, bylǵary, kúmis jáne urshyqpen jumys isteýdi úırene alady. Odan bólek, saq, qańly, úısin jáne ǵun taıpalarynyń kostıýmder kórsetilimi ótedi», - deıdi «Kazakh Tourism» ulttyq kompanııasy basqarma tóraǵasynyń orynbasary Tımýr Dúısenǵalıev.
Shara eki kúnge jalǵasady. 
