Elordada klassıkalyq shahmattan el chempıonatynyń fınaly ótip jatyr
ASTANA. KAZINFORM – Elordada klassıkalyq shahmattan el chempıonatynyń fınaly bastalyp, taqta basynda tek medaldar ǵana emes, ulttyq quramaǵa joldama da sarapqa salynady. Coventry University Kazakhstan alańynda ótip jatqan dodada tájirıbeli grossmeısterler men jas talanttar ózara baq synap, eldiń úzdik shahmatshylaryn anyqtamaq, dep habarlaıdy elorda ákimdiginiń resmı saıty.
2-12 mamyr aralyǵynda ótetin jarys eki sanat boıynsha uıymdastyrylǵan: Open (ashyq) jáne Women (áıelder). Ár topta 14 shahmatshydan baq synap, aınalmaly júıe boıynsha 13 týr bolady. Oıyndar klassıkalyq ýaqyt baqylaýymen ótedi. Demek ár partııaǵa 90 mınýt jáne ár júriske qosymsha 30 sekýnd beriledi.
Chempıonattyń ashylý rásiminde Nura aýdany ákiminiń orynbasary Álııa Ábsemetova jyly lebizin bildirdi.
– Sizderge búgingi jarysta sáttilik tileımin. Shahmat – zııatkerlik, tereń oıdy qajet etetin erekshe oıyn. Ásirese názik jandylardyń osyndaı joǵary deńgeıde óner kórsetip jatqany qýantady, - dedi ol.
Chempıonattyń irikteý júıesi de qatań. Reglamentke sáıkes, 2025 jylǵy Qazaqstan chempıonatynyń úzdik bestigi men 2026 jylǵy chempıonattyń jartylaı fınalynyń úsh jeńimpazy 14 fınalıstiń qataryna tikeleı endi. Sonymen qatar 18 jasqa deıingi (U18) jáne 20 jasqa deıingi (U20) jasóspirimder chempıondarynyń eki jeńimpazy da fınalǵa joldama aldy. Qalǵan oryndar Qazaqstan shahmat federatsııasynyń nomınanttaryna berilip, olardy jattyqtyrýshylar keńesiniń usynysymen federatsııa prezıdıýmy bekitti.
Aldaǵy on kúnde eldiń eń úzdik shahmatshylary ózara kim myqtyny anyqtaıdy.
Týrnırdiń júlde qory da qomaqty. Freedom Holding Corp. usynǵan jalpy júlde qory – 20 mıllıon teńge. Erler men áıelder arasyndaǵy jeńimpazdar 3 mıllıon teńgeden alady. Kúmis júldegerlerge 2,2 mıllıon teńge, al qola júldegerlerge 1,5 mıllıon teńgeden beriledi.
Sonymen qatar bul chempıonat ulttyq quramaǵa irikteýdiń mańyzdy kezeńi sanalady. Jeńimpazdar Qazaqstan atynan halyqaralyq jarystarda, sonyń ishinde Dúnıejúzilik shahmat olımpıadasynda óner kórsetý múmkindigine ıe bolady.
Aıta keteıik, buǵan deıin habarlaǵanymyzdaı, Bıbisara Asaýbaeva álemdik elıtadaǵy úzdik jetilik qataryndaǵy ornyn saqtap qaldy.
