Elordada ıisshil ıt avtokólikten esirtki taýyp aldy
ASTANA. KAZINFORM – «Qarasora – 2025» jedel-profılaktıkalyq is-sharasy barysynda polıtsııa qyzmetkerleri esirtki qylmysyn áshkereledi. Bul týraly QR Іshki ister mınıstrliginiń baspasóz qyzmeti habarlady.
«Kúıgenjar» beketinde polıtseıler BMW kóligin toqtatty. Tekserý kezinde ıisshil ıt Baıkal kólik salonynda tyıym salynǵan zat bar ekenin sezip, belgi berdi.
– Ittiń qyraǵylyǵynyń arqasynda polıtseıler avtokólikten esirtkige uqsas zat – gashıshti tárkiledi. Oqıǵa ornynda 33 jastaǵy azamat esirtki zattaryn saqtaý faktisi boıynsha ustaldy, - delingen habarlamada.
Atalǵan derek boıynsha sotqa deıingi tergeý amaldary bastaldy.
Astana qalasy polıtsııa departamentiniń kınologııalyq qyzmet ortalyǵynda qazirgi tańda 50-den astam qyzmettik ıt bar. Olardyń basym bóligi esirtki men jarylǵysh zattardy izdeýge, iz kesýge jáne qylmys izderin anyqtaýǵa beıimdelgen.
Baıkal esimdi ıt – rotveıler tuqymyna jatady. Ol 4 jyldan beri polıtsııa qatarynda. Negizgi mindeti – esirtki zattaryn izdeý. Baıkal ıis sezýdi oıyn tásili arqyly úırengen jáne ol búginge deıin birneshe qylmystyń ashylýyna úles qosqan.
Polıtsııa azamattardy zańsyz esirtki aınalymyna qarsy kúreske beıjaı qaramaýǵa, kúdikti derekter týraly dereý polıtsııaǵa habarlaýǵa shaqyrady.
Eske sala keteıik, buǵan deıin Bas prokýratýra esirtkige qatysty aqshany baqylaýǵa arnalǵan JI platformasyn iske qosqanyn jazǵan edik.