Elordada qyzylshanyń D8 genotıpi órship tur
ASTANA. KAZINFORM – Elorda aýmaǵynda qyzylshanyń D8 genotıpi taralǵany anyqtaldy. Bul jaıynda Astana qalasynyń bas memlekettik sanıtarlyq dárigeri Sarhat Beısenova aıtty.
«Ulttyq saraptama ortalyǵynyń Astana qalalyq fılıaly Molekýlıarlyq-genetıkalyq zertteýler zerthanasynyń bazasynda aınalymdaǵy qyzylsha vırýsynyń genetıkalyq sıpattamasyna sekvenırleý ádisimen zertteýler júrgizildi. Ol úshin zerthanalyq rastalǵan 17 materıal jiberildi. Genotıpteý nátıjeleri úlgilerdiń 100 paıyz D8 genotıpine jatatynyn kórsetti. Bul shtamm 1980 jyldary Azııada paıda boldy jáne qazir búkil álemge taralyp jatyr. D8 genotıpteri sońǵy 4 jylda Eýropada, Azııada jáne Soltústik Amerıkada bolǵan aýrý oshaqtaryna sebepker genotıpterdiń biri sanalady», - dedi ol Astana qalasynyń kommýnıkatsııalar qyzmetinde ótken brıfıngide.
Bas memlekettik sanıtar dárigerdiń aıtýynsha, elordada qyzylshaǵa qatysty jaǵdaı áli de qolaısyz. Jyl basynan beri qalada qyzylshanyń 2 278 bastapqy jáne 609 rastalǵan jaǵdaıy tirkeldi. Onyń ishinde 14 jasqa deıingi balalar arasynda - 429 jaǵdaı.
«Aýrý eresek kontıngentke aýysa bastady. ıAǵnı, ondaǵy qarqyndy kórsetkish 25,2-den 40,2-ge nemese 37,3 paıyzǵa ósti. Bul rette, júrgizilip jatqan qosymsha jappaı ımmýndaýdyń arqasynda jeltoqsan aıymen salystyrǵanda bir jasqa deıingi, bir jastaǵy jáne 2 jasqa deıingi balalar arasynda syrqattanýshylyqtyń tómendeýin baıqap otyrmyz. Máselen, 1 jasqa deıingi balalardyń aýrýshańdyǵy - 15, bir jastaǵy balalar - 8,5 jáne 2 jastaǵy balalar 21,3 paıyzǵa tómendedi», - dedi Sarhat Beısenova.
