Elordada qyzylsha dertine qatysty jaǵdaı áli de kúrdeli

Astanada balalar, jasóspirimder jáne eresekter arasynda qyzylshaǵa qarsy vaktsına alý jáne odan emdeý jumystary jalǵasýda, dep habarlaıdy Kazinform agenttigi.

«Qalada qyzylshanyń taralýy toqtamaı tur. Kún saıyn 45-ke jýyq jaǵdaı tirkeledi. Búgingi tańda qyzylshanyń 3 328 jańa jaǵdaıy tirkeldi. Onyń ishinde 1 087 jaǵdaı rastalǵan dıagnoz jáne onyń 71 paıyzy (769 jaǵdaı) 14 jasqa deıingi balalar arasynda, 11 paıyzy (117 jaǵdaı) jasóspirimder jáne 18 paıyz eresekter arasynda anyqtaldy», - deıdi qalanyń bas sanıtary Sarqyt Beısenova Astana qalalyq ortalyq kommýnıkatsııalar qyzmet alańynda ótken baspasóz máslıhatynda.

Onyń aıtýynsha, naýqastar arasynda ásirese vaktsına almaǵan balalardyń úlesi áli de joǵary bolyp, 67 paıyzdy qurap otyr.

«Qyzylsha aýrýyna shaldyqqandardyń ishinde 42 paıyzy nemese 326 vırýs juqtyrǵan bala vaktsına alýdan bas tartqan. 28 paıyzy (214) – medıtsınalyq qarsy kórsetilimi boıynsha, 20 paıyzy (149) egý jasyna jetpegen jáne 5 paıyzy ata-analardyń nemquraılylyǵynan ekpe almaı otyr», - deıdi maman.

Brıfıngte aıtylǵandaı, qyzylshaǵa qarsy josparly vaktsınatsııa jalǵasýda. 12-15 aılyq aralyǵyndaǵy sábıler sanynan qyzylshaǵa qarsy josparly ekpemen 92,3 paıyz (22780 bala) jáne 6-7 jastaǵy balalar arasynda 92,6 paıyz (22700 bala) qamtyldy.