Elordada qyzylsha boıynsha epıdemıologııalyq jaǵdaı turaqsyz
Elordada qyzylsha boıynsha epıdemıologııalyq jaǵdaı turaqsyz, dep habarlaıdy Kazinform. Bul týraly Astana qalasynyń Sanıtarlyq-epıdemıologııalyq baqylaý departamenti basshysynyń orynbasary Janna Pralıeva málimdeme jasady.
«22 qarashadaǵy málimet boıynsha qyzylsha aýrýy 1 648 naýqasta tirkelip jáne 639 naýqasta rastalǵan. Onyń ishinde eresekter arasynda 123 jaǵdaı, 15-19 jastaǵy jasóspirimder arasynda 39 jaǵdaı tirkeldi.
14 jasqa deıingi balalar arasynda 474 jaǵdaı tirkeldi, ıaǵnı 74 paıyzdy quraıdy. Onyń ishinde eń kóp jaǵdaı tórt jasqa deıingi balalarǵa tıesili, ıaǵnı 383 jaǵdaı nemese 80%. Osy, 383 jaǵdaıdyń ishinde 90 jaǵdaı, ol 1 jasqa deıingi nárestelerdiń arasynda, bul balalar ekpe alatyn jasqa tolmaǵan», — dedi ol.
Onyń sózinshe, naýqastardyń ishinde qyzylshaǵa qarsy ekpe alǵandar tek 5 paıyzdy quraǵan (34 jaǵdaı).
Vaktsına almaǵandardyń úles salmaǵy 95 paıyz (605 jaǵdaı). Onyń ishinde:
— vaktsınatsııadan óz erkimen bas tartý sebebi boıynsha 42,3 paıyz (256 jaǵdaı);
— medıtsınalyq qarsy kórsetilimi boıynsha 21,4 paıyz (129 jaǵdaı);
— eresekterdiń 21,4 paıyzynda (130 jaǵdaı) vaktsınatsııa týraly derekterdiń joq bolýy.
— egý jasyna jetpegen 1 jasqa deıingi balalar 14,9 paıyz (90 jaǵdaı).
Esterińizge sala keteıik, búgingi kúni Ulttyq profılaktıkalyq egý kúntizbesine sáıkes qyzylshaǵa qarsy ekpe eki ret júrgiziledi: ol 1 jasta jáne 6 jasta.
Qyzylsha óte juqpaly aýrý jáne kóp ujymda, ásirese mektepke deıingi balalar uıymdarynda, mektepterde, joǵary oqý oryndarynda jıi tirkeledi. Kóbinese qyzylsha vaktsına almaǵan balalar arasynda basym bolady. Máselen, uıymdasqan ujymdarda:
— 66 balabaqshada 106 rastalǵan jaǵdaı. Onyń ishinde, 96 bala ekpe almaǵan. Shekteý sharalarymen búgingi tańda 15 balabaqsha jumys istep jatyr.
— 37 mektepte 52 rastalǵan jaǵdaı. Onyń ishinde, 45-inde vaktsınatsııa bolǵan joq.
— 5 joǵary oqý orny arasynda 27 jaǵdaı tirkeldi.
«Profılaktıkalyq ekpelerden bas tartýdyń kóbeıýi, medıtsınalyq qarsy kórsetilim boıynsha jáne ımmýndaýmen qamtýdyń tómendigi halyqtyń ımmýndyq emes qabattyń paıda bolýyna ákelip soqty. Egý jasyna jetpegen 1 jasqa deıingi balalar arasynda qyzylsha aýrýynyń kóptep tirkelýine baılanysty QR Bas memlekettik sanıtarııalyq dárigeriniń qaýlysy shyǵaryldy. Onda 6 aıdan 10 aı 29 kúnge deıin deıingi balalardy egý kórsetilgen. Búgingi tańda osy jastaǵy 2 500-den astam bala ekpe aldy. Osy oraıda, ata-analardy balalaryńyzdyń densaýlyǵyna nemquraıly qaramaı, vaktsına alýǵa shaqyramyn. Sebebi, balańyzdyń salaýatty ómir súrýi sizdiń jaýapkershiligińizde!» — dedi Janna Pralıeva.
