Elordada qysqa daıyndyqpen qatar, kommýnaldyq qyzmetkerlerge qamqorlyq kúsheıtildi
ASTANA. KAZINFORM — «Jumysshy mamandyqtary» jyly elorda tazalyq qyzmetinde jańa áleýmettik bastamalar iske asty. Jol jumysshylaryna jańa demalys oryndary men baspana berildi.
Qarly boran men saqyldaǵan aıazymen tanymal saryarqa qysy kommýnaldyq qyzmetke aýyr túseri anyq. Sondyqtan kún saıyn qala tazalyǵyn qamtamasyz etetin eńbekkerlerge jaǵdaı jasaý «Astana Tazalyq» kásipornynyń basym baǵyty sanalady.
Mekeme jetekshisi Zamır Sagınov tazalyq qyzmetkerleriniń jaýapty jumysyn joǵary baǵalaıtynyn jetkizdi.
— Qalanyń tazalyǵy men qaýipsizdigi osy mamandardyń kún saıynǵy mańdaı terimen tikeleı baılanysty. Olar eń aldymen jelige shyǵyp, elorda turǵyndarynyń jaıly ómiri úshin eńbek etedi, — dedi ol.
Sońǵy bir jyl ishinde «Astana Tazalyq» qyzmetkerlerdiń áleýmettik qoldaýyn kúsheıtýge baǵyttalǵan birneshe keshendi sharalardy júzege asyrdy.
Jańartylǵan demalys jáne turmystyq bólmeler
Ótken jyly «Astana Tazalyq» kásiporny jol jumysshylaryna arnalǵan demalys pen turmystyq bólmelerdi kúrdeli jóndeýden ótkizdi. Atalǵan joba Astana qalasy ákimdiginiń qoldaýymen iske asyrylyp, qyzmetkerlerdiń kúndelikti eńbek jaǵdaıyn edáýir jaqsartýǵa múmkindik berdi.
Kásiporyn Esil jáne Nura aýdandarynda ornalasqan jalpy aýmaǵy 1000 sharshy metrge jýyq 10 bólmeni jańartyp, tolyqqandy turmystyq ınfraqurylym qalyptastyrdy.
Buryn jumysshylar tar ári qolaısyz jertóle tıptes bólmelerdi paıdalanýǵa májbúr bolsa, búginde 200-den astam jol qyzmetkeri jaryq, keń, zamanaýı demalys oryndaryn kúndelikti qoldana alady.
Bul bólmeler jumysshylardyń jylynyp, tynyǵyp, kelesi aýysymǵa daıyndalýyna arnalǵan barlyq jaǵdaımen jabdyqtalǵan.
Qyzmetkerlerdi baspanamen qamtamasyz etý
Áleýmettik qoldaý sharalarynyń mańyzdy baǵytynyń biri — qyzmetkerlerdi baspanamen qamtamasyz etý. Osyǵan oraıda kásiporyn birqatar naqty jobalardy iske asyryp, 10 bir bólmeli jáne eki bólmeli qyzmettik páterdi, sondaı-aq 80 oryndyq jataqhanany paıdalanýǵa berdi. Búginde alǵashqy jeti qyzmetker jańa páterdiń kiltin alyp, qonystoıyn toılap jatyr.
Jańa baspananyń ıgiligin kórip otyrǵandardyń qatarynda — kásiporynda bes jyldan astam ýaqyt eńbek etip kele jatqan arnaıy tehnıka júrgizýshisi Baqytjan Abdýalıev bar. Onyń uly men baýyry da «Astana Tazalyq» quramynda qyzmet etedi, ıaǵnı bul otbasynyń birneshe múshesi qalanyń tazalyǵy úshin kún saıyn eńbek etedi. Kompanııa tek tájirıbeli mamandardy ǵana emes, jas kadrlardy da nazardan tys qaldyrmaıdy. Jaqynda úıli bolǵandardyń arasynda uıymǵa bir jyldan astam ýaqyt buryn kelgen jas júrgizýshi Erkin Qadyrbaı da bar. Eki balasyn tárbıelep otyrǵan áke úshin bul qoldaý — úlken demeý.
Kásiporyn qyzmetkerlerdiń turmystyq jaǵdaıyn jaqsartýmen shektelmeı, olardyń sapaly ári qoljetimdi tamaqtanýyn da turaqty baqylaýda ustaıdy. Kásipodaqpen birlesken jumystyń nátıjesinde áleýmettik paket keńeıtilip, materıaldyq kómek pen turmystyq qoldaýdyń jańa túrleri engizildi. Buǵan qosa, jumysshylardyń biliktiligin arttyrý, eńbek mádenıetin nyǵaıtý jáne jas mamandardy tartý baǵytynda qosymsha sharalar júzege asyrylyp jatyr.
Zamır Sagınov kásiporyn qyzmetkerleriniń jalaqysyna da toqtaldy.
— Qys mezgilinde júrgizýshiler men mashınısterge shamamen 700-800 myń teńge, al jazda 500-550 myń teńge kóleminde jalaqy tólenedi. Injenerlik-tehnıkalyq personaldyń eńbekaqysy 300-400 myń teńgeni quraıdy, — dedi ol.
Sonymen birge kompanııa aldaǵy ýaqytta da motıvatsııa júıesin jetildirip, eńbek jaǵdaıyn jaqsarta beretinin atap ótti.
Jumysshylarǵa qamqorlyq — bir rettik aktsııa emes
Mekeme basshylyǵynyń aıtýynsha, jumyskerlerge jasalǵan qamqorlyq — bir rettik aktsııa emes, kásiporyn strategııasynyń negizgi bóligi.
— Qalaǵa qamqorlyq eń aldymen osy jumysty kún saıyn atqaryp júrgen adamdardan bastalady. Ár qyzmetker qurmet pen qoldaýdy sezinýi tıis, — dedi «Astana Tazalyq» basshysy.
Budan buryn Astanada kóktaıǵaqqa qarsy jańa reagent qoldanylatynyn jazǵanbyz. Magnıı negizindegi qaýipsiz reagentter –30°S aıazda da tıimdi kórinedi.