Elordada kishkentaı qyz bala 100-den astam magnıtti jutyp qoıǵan
NUR-SULTAN. QazAqparat – Elordada jeti jasar qyz bala 100-den astam kishkentaı magnıtti jutyp qoıǵan. Hırýrgter ota jasap, balanyń murny men asqazanynan magnıtterdi alyp tastady. Bala qazir emdelip jatyr, dep habarlaıdy QazAqparat qala ákimdigine silteme jasap.
Ata-analar balasyn damytýǵa arnalǵan oıynshyqtarmen qýantamyn dep júrip, onyń densaýlyǵyna qandaı zııan keltirgenin bilmeı qalýy da múmkin. Bul bir-birine jabysatyn magnıt shar, tekshe, monshaq tárizdi oıynshyqqa qatysty.
Byltyr №2 Kópbeıindi qalalyq balalar aýrýhanasyna óńesh, asqazan, asqazan-ishek joldary (AІJ) jáne bronhtarǵa bógde zattar túsip ketken 162 bala kómekke júgingen.
«Negizinen túıme, monshaq, pýlttiń batareıasy sekildi túrli usaq zatty jutyp qoıǵan 1 men 5 jas aralyǵyndaǵy balalar keledi. Dárigerler alyp tastaǵan bógde zattardyń 17 paıyzy – magnıt. Kóbinese mundaı jaǵdaı bala oınap júrgende, qaraýsyz qalǵanda bolady», – deıdi hırýrg-dáriger Serikjan Nurjanov.
Aýrýhananyń málimetinshe, 56 balanyń óńeshinen osyǵan uqsas bógde zattar alynǵan, 80 balanyń asqazan men asqazan-ishek jolynan osnydaı zattar tabyldy, bóten zattar bronh jáne tynys jolyna túsip ketken 30 bala tirkelgen.
«Ótken aptada magnıtti-rezonansty tomografııalyq (MRT) zertteý úshin aýrýhanaǵa túsken 7 jasar qyzǵa operatsııa jasaldy. Balanyń murnyn tekserý kezinde dárigerler bóten zattar murynyn (magnıtter) bitep qalǵanyn anyqtady.
Osydan keıin bala rentgenge túsýge jiberilip, asqazanda magnıtterdiń jınalǵany anyqtady. Nátıjesinde biz 100-den astam kishkentaı magnıtti alyp tastadyq. Qazirgi ýaqytta balany tekserý jáne tolyq emdeý júrgizilip jatyr», – dedi aýrýhananyń hırýrgııa blogynyń jetekshisi Rınat Baıgıreev.
«Eger bala magnıtti jutyp qoısa, ol óńeshte turyp qalady, al basqa jaǵdaıda asqazanǵa túsedi. Odan ári bógde zattardyń asqazan-ishek joldaryna túsip ketýine aınalmaly bulshyq et kedergi keltiredi. Eger magnıttiń ótkir, úshkir tustary bolsa, óńeshtiń shyryshty qabyǵyna ártúrli deńgeıde zaqym keledi, tipti tilip ketýi múmkin. Ásirese aýyr zardaptar bóten zatty birden emes, birneshe kúnnen keıin alyp shyqqan kezder boldy. Qabyný saldarynan ınfıltratsııa ǵana emes, tinderdiń nekrozyn týdyratyn jara paıda bolady», – dedi hırýrg-dáriger Serikjan Nurjanov.
Sondaı-aq, ol bógde zat denede neǵurlym uzaq bolsa, bala úshin soǵurlym qaýipti.
«Eger bala bir magnıtti jutyp qoısa, onda ol negizinen tabıǵı túrde ózi shyǵady. Eger olar denede uzaq ýaqyt bolsa jaǵdaı qıyndaıdy. Olar asqazan-ishek joldarynyń ártúrli bólikterine jabysyp qalady. Al jabysqan jerde nekroz perforatsııaǵa deıin damıdy jáne perıtonıtke ulasady. Eger tynys alý jolynda bógde zat bolsa, onda ol atelektazge ulasady, sol jerde perforatsııa, medıastınıt paıda bolyp, irińdeı bastaıdy, al eger asqazanǵa ne ishekke tússe de perforatsııa men perıtonıt týdyrady», – deıdi maman Nurjanov.
Dárigerler ata-analarǵa saq bolýy kerektigin jáne mundaı jaǵdaıda dereý medıtsınalyq kómekke júginý qajettigin eskertedi.
