Elordada kınorejısser Ermek Tursynovtyń «Mámlúk» romanynyń tusaýkeser rásimi ótti

dep habarlaıdy QazAqparat.

«Bul kitap arab halıfatyn bılegen Beıbarys sultanǵa arnalǵan. Shyǵarma jelisi 13 ǵasyrdy qamtıdy. Bul mámlúkterdiń bılik qurǵan kezeńimen tuspa-tus keledi. Kitap 6 jyl boıy mámlúkterdiń júrip ótken qumymen, jazyq dalasymen sharlap, bekinisterinde túnegen qyzyqty sapar barysynda jazyldy. Sebebi men kabınette otyryp jazatyn jazýshy emespin. Uzaq ýaqyt boıy arab elderinde, atap aıtqanda Beıbarys sultan jerlengen Sırııada, Egıpette, Iordanııada, Iemende, Izraılde turdym», deıdi E.Tursynov.

Onyń aıtýynsha, kitap kórkem shyǵarma bolǵanymen ondaǵy oqıǵa jelisi arab, frantsýz, nemis jáne qazaq tarıhı derekterine negizdelip jazylǵan. Jalpy bul taqyrypqa barýyna Beıbarys sultannyń qazaq jeriniń týmasy bolýy túrtki bolǵan.

Shara barysynda arab tilinde jaryq kórgen Beıbarys sultan týraly kitapty alǵash ret qazaq tiline aýdarǵan «Egemen Qazaqstan» gazetiniń prezıdenti Saýytbek Ábdirahmanov sóz sóılep, «E.Tursynov  kitabynyń 150-deı ǵana betin oqyp úlgerdim, bastapqyda stsenarıı tili sııaqty bolyp qabyldanǵan bolatyn. Biraq bul - aldamshy túsinik. Avtordyń ózindik tili bar. Bul kıno tili de emes. Proza men kıno tili arasyndaǵy orta til. Múmkindiginshe frazany sýretke qurý, múmkindiginshe frazanyń oınap turýy kádimgideı bir prozanyń jańa túri retine kórinýi tıis. Eger bolashaqta «Mámlúk» kitaby qazaq tiline aýdarylsa jáne stıline qatty kóńil bólinse, biraz jazýshyǵa «osylaı da jazýǵa bolady eken-aý» degen oı salady», dedi.

Onyń aıtýynsha, álemdegi eń tarıhı, eń baıypty, eń ǵylymı basylym retinde tanymal «Brıtanıka» entsıklopedııasynda Beıbarys týraly arnaıy maqala jarııalanǵan. Eki nusqada taralatyn basylymnyń elektrondyq nusqasynda shamamen 4 bet, al kitap kúıindegide 50 joldaı Beıbarysqa arnalǵan maqala bar. Ár áripi sanalatyn kitap úshin bul óte kólemdi maqala. Bul basylymda Beıbarystyń úsh eńbegi atalady. Ol - mońǵol shapqynshylyǵyn, krest joryqtaryn toqtatýy jáne ıslam dinin kóterýi.