Elordada keıbir reıs keıinge qaldyryldy
NUR-SULTAN. QazAqparat – Elordada keıbir reıs keıinge qaldyrylyp, jolaýshylar ýaqytynda ushyp kete almaı jatyr, dep habarlaıdy QazAqparat tilshisi.
Máselen, Nur-Sultannan Ystanbulǵa ushaq búgin tańǵy 04.00-de ushyp ketýi tıis bolǵan. Alaıda reıs keshki 19.00-ge shegerilip, jolaýshylar ushaqqa endi jaıǵasty. Áleýmettik jelilerde qalyń tumannyń saldarynan keıbir reıster múlde toqtap, keıbiri keshiktirilip jatqany jazylýda. Máseleniń mán-jaıyn Nursultan Nazarbaev halyqaralyq áýejaıynan bilip kórdik.
«Dál qazirgi ýaqytta Úrimji, Ystanbul qalalaryna ushatyn ushaqtar belgilengen ýaqyttan keshigip ushqaly jatyr. Áıtpese, áýejaı shtattyq rejimde jumys istep tur. Bizde ushyp keletin reısterge baılanysty keshiktirý jaǵdaılary boldy. Sebebi, basqa jaqtardan keıbir ushaqtar áýejaıǵa jaı ushyp keldi. Ushý-qoný jolaqtarynyń bári ashyq. Kúni keshe Almatyda tuman boldy dep, onda reısterdiń keshiktirilgeni habarlanǵan edi. Tıisinshe, ol jaǵdaı bizge de áser etedi. Bizge kelgen ushaqtar keste boıynsha ushyp jatyr», - dep habarlady Nursultan Nazarbaev halyqaralyq áýejaıynyń baspasóz qyzmetinen.
