Elordada keıbir qoǵamdyq oryndar karantındik sharalardy saqtamaı otyr
Arnaıy monıtorıng toby quramynda BAQ ókilderi de aralaǵan nysandardyń biri Esildiń sol jaǵalaýynda ornalasqan Máskeý bıznes ortalyǵyndaǵy qoǵamdyq tamaqtaný orny boldy.
«Kirgen ýaqytta tamaqtaný orny qyzmetkerleriniń maskasyz júrgendigin, kelýshilerdiń dene qyzýyn ólshemeıtindigin anyqtadyq. Buǵan qosa, kelýshilerge kalıan usyndy eken. Ústelderdiń arasyndaǵy ara qashyqtyq ta saqtalmaǵan. Tekserý qorytyndysynda 4 adamǵa aıyp saldyq. Jalpy, qazirgi ýaqytta Nur-Sultan qalalyq bas sanıtarlyq dárigeriniń qaýlysyna sáıkes, karantın ýaqytynda elordadaǵy kóńil kóterý oryndarynda kalıan sheshýge tyıym salynǵan. Sebebi, elimizde koronavırýs ınfektsııasynyń tirkelýi, taralýy oryn alyp otyr. Buǵan qosa kalıan arqyly indeti juqtyryp alý táýekeli óte joǵary bolyp tur», - dedi Esil aýdandyq taýar men kórsetiletin qyzmetterdiń sapasyn baqylaý basqarmasynyń basshysy Arman Qurbanov.
Onyń aıtýynsha, karantın rejımi bastalǵannan beri qala aýmaǵynda arnaıy monıtorıng toptary qoǵamdyq nysandarǵa kúndelikti monıtorıng júrgizip jatyr.
«Jeke adamdarmen qatar monıtorıng toby anyqtaǵan qoǵamdyq oryndarǵa sanıtarlyq-epıdemıologııalyq organ tarapynan da aıyppul salynady. Aıyppul kólemi «QR Ákimshilik quqyq buzýshylyq týraly« kodeksiniń 462-baby 3-tarmaǵyna sáıkes 100-den 500 aılyq eseptik kórsetkishke deıingi somany quraıdy. Monıtorıngileý jumystary karantın sharalary alynyp tastalǵanǵa deıin jalǵasady», - dedi ol.
Arnaıy monıtorıng toby Almaty aýdanyna kiretin Qoshqarbaev kóshesi boıynda ornalasqan laýndj barǵa da bas suqqan edi. Bul jerde de BAQ ókilderi karantın talaptarynyń óreskel buzylǵandyǵyna, kelýshilerdiń emin-erkin kalıan tartqanyna kýá boldy. Monıtorıng toby quramyndaǵy polıtsııa qyzmetkerleri karantın talaptaryn buzýshylarǵa, sonymen qatar laýndj bar ákimshisine ákimshilik hattama toltyrdy.
