Elordada keshki mektep dırektory jumys istemeıtin týystaryna 4 mln. teńge jalaqy aýdarǵan
ASTANA. 27 maýsym. QazAqparat - Qyzmettik ókilettigin teris paıdalanatyn tulǵalar memleketke mıllıondaǵan soma kóleminde zııan keltiredi.
Elordada osyndaı 5 qylmys anyqtaldy. Bul aqparatty Astana qalalyq ekonomıkalyq jáne sybaılas jemqorlyqqa qarsy kúres departamentiniń baspasóz qyzmeti taratyp otyr.
Vedomstvonyń habaralýynsha, is júzinde jumys istemeıtin, biraq mektep shtatynda tirkelgen týǵan-týystary men muǵalimderge jalaqy esepteý arqyly 4 mln. teńge jymqyrǵan Astana qalasynyń keshki mektep dırektory Ysqaqovaǵa qatysty qylmystyq is qozǵaldy.
Máselen, 2007-2008 jyldar aralyǵynda mektep dırektorynyń orynbasary qyzmetinde Ysqaqovanyń jubaıy, al ol jumystan bosatylǵannan keıin 2008 jyldyń naýryzynan qyrkúıegine deıin bul qyzmette Ysqaqovanyń uly syrttaı atqarǵan. 2008-2009 jyldary aralyǵynda mekteptiń is júrgizýshisi qyzmetinde onyń qyzy bolǵan. Dál osylaı, ıaǵnı naqty jumys istemeıtin 5 oqytýshyǵa eńbek aqy tólengen.
Aqsha qarajattarynyń bir bóligi jalǵan jumys isteıtin tulǵalardyń esep shottaryna aýdarylyp, Ysqaqova ózi alyp otyrǵan. Al basqa bóligi naqty jumys isteıtin muǵalimderdiń esep shottaryna túsip, mektep dırektoryna berilgen.
