Elordada Keruen men Ábý-Dabı Plazada ekpe pýnktteri ashyldy
NUR-SULTAN. QazAqparat – Elordada «Keruen» men «Ábý-Dabı Plazada» COVID-19-ǵa qarsy vaktsınatsııa pýnktteri ashyldy, dep habarlaıdy QazAqparat qala ákimdigine silteme jasap.
Eki apta buryn saýda ortalyǵyndaǵy alǵashqy egý pýnkti «Mega Silk way»-da ashylǵan. Al 19 sáýirden bastap «Han Shatyr» SOO-da vaktsına qabyldaý múmkindigi jasaldy.
«Saýda-oıyn saýyq ortalyqtarynda vaktsınatsııalaý jumysyn uıymdastyrý jaqsy tájirıbe kórsetip otyr. Osy arqyly qala turǵyndaryn qamtý kórsetkishi artyp keledi. Alǵashqy ýaqytta turǵyndar vaktsınatsııadan úreılense, qazir jaǵdaı kerisinshe, jurt vaktsına alǵandar qataryn belsendi túrde tolyqtyrýda. Mysaly, «Mega Silk way»-da medıtsına qyzmetkerleri 2 100-den astam adamdy vaktsınatsııalady. Bul bir ǵana ortalyqtyń kórsetkishi», — deıdi Qoǵamdyq densaýlyq saqtaý basqarmasy basshysynyń orynbasary Álııa Rústemova.
«Keruen» jáne «Ábý-Dabı Plazadaǵy» jumys ýaqyty aldyńǵy eki ortalyqqa uqsas, ıaǵnı saǵat 10:00-den 22:00-ge deıin.
Halyqty vaktsınatsııalaýmen keńinen qamtý úshin qala ákimi Altaı Kólginovtiń tapsyrmasy boıynsha egý pýnktteriniń sany 36-dan 100-ge deıin, sondaı-aq jumys ýaqyty 08:00-den 00:00-ge deıin, SOO-larda 10:00-den 22:00-ge deıin uzartyldy.
Elordalyqtar COVID-19 vaktsınasyn alýǵa belsendi túrde nıet bildirgendikten Qoǵamdyq densaýlyq saqtaý basqarmasy eńbek ujymdaryn jappaı vaktsınatsııalaý úshin kóshpeli brıgadalar uıymdastyrady. Túrli kásiporyndarda KVI-ǵa qarsy vaktsına alǵysy keletinderdiń sany 1000 adamǵa jetedi.
Búgingi kúni qala boıynsha 75 myńǵa jýyq adam vaktsınatsııalandy.
Eske sala ketsek, Nur-Sultan qalasynyń bas memlekettik sanıtarlyq dárigeri Sarhat Beısenova elordada halyq kóp jınalatyn oryndarda turǵyndarǵa vaktsına salý pýnktteri ashylatyn aıtqan edi.
