Elordada Kenesary jaıly tarıhı romannyń tusaýy kesildi
ASTANA. KAZINFORM — Elordada Astana Eurasian Book Fair 2024 halyqaralyq kitap kórme-jármeńkesinde jazýshy, halyqaralyq «Alash» ádebı syılyǵynyń ıegeri Ádilbek Ybyraıymulynyń «Semser júzindegi sert» tarıhı roman-trılogııasynyń tanystyrylymy ótti.
Bul úsh tomdyq «Arlannyń azýy», «Sert» jáne «Rýh» dep atalatyn kólemdi úsh kitaptan turady.
Tarıhı týyndy qazaqtyń sońǵy hany Kenesary Qasymulynyń ómiri men erlik isteri týraly syr shertedi.
Jańa shyǵarma «Folıant» baspasynan jaryq kórgen.
Osy sharanyń uıymdastyrýshysy da atalǵan baspa bolyp otyr.
Rýhanı is-sharany moderatory, aqyn, Qazaqstan Jazýshylar odaǵy Astana qalasy fılıalynyń dırektory Dáýletkereı Kápuly júrgizdi.
Kirispe sózinde D.Kápuly:
«Jalpy, kitap degen tozbaıtyn aqyldyń keni. «Jaqsy at arba-shanaǵa birdeı júredi» degendeı, Ádilbek Ybyraıymuly ári aqyn, ári jazýshy. Bir ózinde birneshe óner keni bar daryndy qalamger. Kenesaryǵa arnalǵan kitaptyń ataýy da kóp jaıttan habar berip tur», - dedi.
Oqyrmanǵa jol tartqaly otyrǵan úsh tomdyq eńbek týraly qalamgerler Qýanysh Jıenbaı, Janbolat Aýpbaı, Tortaı Sádýaqasovtar pikir bildirdi.
Senat depýtattary Nurtóre Júsip, Ǵalıasqar Sarybaev pen Amangeldi Tolamısov jáne Májilis depýtaty Bolat Kerimbek qoǵamda kitap oqýdyń mańyzyn kúsheıtý týraly oılaryn ortaǵa saldy.
Senator Nurtóre Júsip:
«Balanyń rýhyn tazalyqqa tárbıeleýdiń mańyzy zor. Tili shyqqan soń taqpaq jattaǵan, eseıe kele óleńge qumartqan baladan izgi nıetti azamat qalyptasatyny anyq. Biz jas urpaqty ádebıet, óner, mádenıet arqyly tárbıeleýimiz kerek. Bul máseleni Ulttyq quryltaı jıynynda Qazaqstan Prezıdenti Qasym-Jomart Toqaev ta aıtty», - dedi.
Alashtanýshy ǵalym Qaırat Saq kitap avtorymen Qazaq memlekettik ýnıversıtetinde birge oqyǵanyn aıta kelip, Ádilbek Ybyraıymulynyń búgingi tańda ádebıet álemindegi qol jetkizgen tabysyn zamandastary joǵary baǵalaıtynyn jetkizdi.
Óz sózinde Ádilbek Ybyraıymuly bul týyndysyna birqatar ózgerister engizip, «Folıant» baspasynan qaıta shyǵaryp otyrǵanyn málimdedi.
Avtor Kenesary hannyń ómirindegi qıly kezeńder, ult-azattyq kóterilisin bastap shyqqan kezde júrgizgen soǵysýdyń amal-tásilderi jóninde áńgimelep berdi.
Jınalǵan qaýymǵa jáne «Folıant» baspasy men osy sharany uıymdastyrýshylarǵa rızashylyǵyn bildirdi.
