Elordada Kenen Ázirbaev týraly derekti fılmniń tusaýy kesildi
ASTANA. 20 mamyr. QazAqparat /Jasulan Amanbaıuly/ - Búgin Astanadaǵy QR Prezıdenttik mádenıet ortalyǵynda qazaq halqynyń dúldúl aqyny, jyrshysy, kúmis kómeı ánshisi ári kompozıtory Kenen Ázirbaevtyń ómiri men shyǵarmashylyǵy týraly túsirilgen «Alataýdyń aqıyǵy» atty derekti fılmniń tusaýy kesildi.
Atalǵan derekti fılmde eki ǵasyrdyń kýágeri, Alataýdyń bulbuly atanǵan, ómiriniń sońyna deıin halqyna qyzmet etken aqıyq aqyn jaıly balalarynyń, jerlesteriniń, aqyn, sazger, ǵalymdardyń, óner zertteýshiler men basqa da kórnekti tulǵalardyń ár kezeńde aıtqan oı-pikirleri, estelikteri jan-jaqty beriledi.
Fılm túsirilimi barysynda, sonymen qatar, Qazaqstan Respýblıkasynyń kınofoto qujattary, dybys jazý jónindegi memlekettik jáne Baqytjan Kenenulynyń jeke muraǵatynan alynǵan kıno úzindiler men fotosýretter paıdalanylǵan.
Stsenarııdiń avtorlary onyń uly - Baqytjan Ázirbaev pen Doqtyrhan Turlybek, al keńesshisi - fılologııa ǵylymdarynyń doktory, professor Myrzataı Joldasbekov.
Kıeli Qordaı jerinde artynda án men jyrdyń óshpes murasyn qaldyrǵan, Alataýdaı asqaq aqyn, kúmbir keýde kompozıtor bolǵan Kenen Ázirbaev - qazaq halqynyń ónerin tula boıyndaǵy týma talantymen ulttyq bıiktikke kóterip, ǵasyrlyq keńistikke jetkizgen aqıyq tulǵalardyń biri.
Ǵasyrǵa jýyq ǵumyr keshken Kenen ózi ómir súrgen zamandaǵy áıgili «ııýn jarlyǵy», sonymen sabaqtas 1916 jylǵy ult-azattyq qozǵalysy, odan sońǵy Qazan tóńkerisi, ujymdastyrý naýqany, halyq dáýletiniń jappaı tárkilenýi, halyqty qynadaı qyryp ketken asharshylyq, úrkinshilik , soǵys, odan keıingi tyń ıgerý men ekpindi qurylystar salý barysyndaǵy jelbýaz uranshyldyq sııaqty halyq taǵdyryna túbegeıli ózgeris engizgen tarıhı oqıǵalardyń bel ortasynda boldy. Jaı syrttaı baqylaýshy emes, sol tarıhı oqıǵalarǵa Kenen sergek aralasyp, óziniń azamattyq pozıtsııasyn boıyndaǵy býyrqanǵan daryny arqyly aıǵaqtap otyrdy.
Onyń ánshilik, kompozıtorlyq bolashaǵyna ánshi-jyrshylardyń, dombyrashy-kúıshilerdiń áseri zor boldy. Ásirese, Jambyl, Sarybas, Balýan Sholaq, Shashýbaı syndy belgili ánshi-aqyn, kompozıtorlardan úlgi-ónege alǵan. Aqyn-kompozıtordyń «Boztorǵaı», «Kóksholaq», «Bazar-Nazar», taǵy basqa ánderi halyq súıip aıtatyn máńgilik rýhanı qazynaǵa aınalǵan.
Kenen óziniń eleýli eńbegi úshin el qurmetine bólenip, Qazaq KSR-ne eńbek sińirgen óner qaıratkeri, KSRO Jazýshylar odaǵy men KSRO Kompozıtorlar odaǵynyń múshesi jáne Lenın, Eńbek Qyzyl Tý ordenderiniń ıesi boldy. Qazaq KSR-i Joǵarǵy Keńesiniń Qurmet gramotasymen birneshe ret marapattaldy.
