Elordada kemirgishtermen kúres jumystary qaı kezde júrgiziletini habarlandy
ASTANA. KAZINFORM – Elimizdiń bas qalasynda 2025 jyly kemirgishtermen kúres eki maýsymda – kóktem men kúzde júrgiziledi. Sáýir aıynda deratızatsııa jumystary bastalady, dep habarlaıdy elorda ákimdiginiń resmı saıty.
Sanıtarlyq normalarǵa sáıkes 2025 jyly deratızatsııa jumystaryn eki maýsymda (kóktem jáne kúz) júrgizý josparlanyp otyr. Jabyq stantsııalar 21 sáýirden 18 mamyrǵa deıin, al ashyq stantsııalar 20 sáýirden 1 maýsymǵa deıin jumys isteıdi.
Jeke sektor (turǵyn aýmaqtar) jáne ashyq aýmaqtar (saıabaqtar, ózender, sý qoımalary, kanaldar, zırattar) óńdeýge jatady. Іs-shara kezinde turǵyndarǵa arnaıy ýlandyrǵyshtar tegin taratylyp, qaýipsizdik tehnıkasy boıynsha túsindirý jumystary júrgiziledi.
Deratızatsııa Qazaqstanda qoldanýǵa ruqsat etilgen ýlandyrǵyshtardy paıdalana otyryp júzege asyrylady. Mundaı sharalar kemirgishterdiń sanyn azaıtyp, asa qaýipti juqpaly aýrýlardyń taralýyn boldyrmaý úshin qajet.
Eske sala keteıik, buǵan deıin Astanada Belsendi uzaq ómir súrý ortalyǵy ashylǵanyn habarlaǵan edik.