Elordada kemirgishtermen kúres baqylaýǵa alyndy
ASTANA. 2 tamyz. QazAqparat /Qanat Mámetqazyuly/ - Astana qalasy ákiminiń saıtyna sońǵy kezderi sol jaǵalaýdyń turǵyndarynan qońyzdar men kóbelekterdiń qaptap ketýine alańdaýshylyq bildirip, shara qoldanýdy suraıtyn hattar jıilep ketti.
Osyǵan oraı, Astana qalasy ákimdiginiń baspasóz qyzmeti birqatar sharalardyń atqarylýyn habarlaıdy.
«Mysaly, «Sýly-jasyl býlvar» turǵyn úı kesheniniń turǵyndary fıtosanıtarlyq jaǵdaıǵa baǵa berýdi jáne olardyń kireberisterine jaıǵasqan jándikterden qanshalyqty qaýiptený qajet ekenin suraǵan. Olardyń suraýy boıynsha «Fıtosanıtarlyq dıagnostıka jáne boljamdar respýblıkalyq ádisteme ortalyǵy» MM Tselınograd aýdandyq fılıalynyń dırektory Erjan Ibraevqa júgingen edik. Onyń aıtýynsha, tek «Esil» aýdany ǵana emes, elordanyń barlyq úsh aýdanynyń fıtosanıtarlyq jaǵdaıy qalypty. Negizinen, shalǵyndyq usaq kóbelektiń shabýylynan qalanyń saıabaqtary, «Astana ormany» MKK sanıtarlyq qorǵaý aımaǵy, «Astana Kógaldandyrý» AQ pıtomnıkteri zardap shegedi. Zardap shekken jalpy aýdan 4000 ga, biraq olardyń aýdany áli de ósýi múmkin», - delingen baspasóz aıǵaǵynda.
«Fıtosanıtarııa» RMK júrgizgen jumystardy esepteý boıynsha 1 gektar aımaqty óńdeý úshin 4680,6 teńge qajet, ıaǵnı barlyq aýmaqty óńdeýge 18,8 mln. teńge qarajat qajet bolady. Tamyz aıynyń basynda shalǵyndyq usaq kóbelek qurttaryn joıý úshin aýmaqqa hımııalyq óńdeý jasaý josparlanyp otyr.
Baryldaq qońyzdar bıylǵy jazdyń taǵy bir problemasyna aınalyp otyr.
«Biraq elorda turǵyndary men qala qonaqtaryna baryldaq qońyz shabýylyna baılanysty alańdaýdyń qajeti joq, sebebi ol adam, janýar, ósimdiktiń ómirine qaýipti emes. Kerisinshe, qońyz zııankestermen, qurttarmen qorektenip, adamǵa paıda ákeledi. Baryldaq qońyzdar kóptegen zııankesterdiń sanyn rettep otyrady. Mundaı túrler ejelden zııankestermen kúres úshin qoldanylyp kelgen, olar paıdaly bolǵandyqtan, bul qońyzdarmen kúreske qarajat bólingen joq. Elorda turǵyndary, sharýashylyq sýbektileri men ǵımarat ıeleri baryldaýyq qońyzben ózderi, óz qarajatyna kúrese alady. Alaıda óz densaýlyǵyna zııan keltirmeý úshin osy jándikpen kúreste dezınfektsııa, dezınspektsııa jumystaryna lıtsenzııasy bar uıymdardy shaqyrtqan jón. Óıtkeni eldi mekender aýmaǵynda tek ruqsat etilgen ınsektıtsıd preparattaryn qoldanyp, pestıtsıdterdi qoldaný erejesin qatań saqtaý qajet», - dedi E. Ibraev.
Onyń aıtýynsha, turǵyndarǵa 317-139 telefony boıynsha «Qazaqstan Respýblıkasy Densaýlyq saqtaý mınıstrliginiń Memlekettik sanıtarlyq-epıdemıologııalyq qadaǵalaý komıtetiniń departamenti» mekemesine nemese qaladaǵy dezınfektsııa, deratızatsııa jumystarymen aınalysatyn mekemelerge tikeleı habarlasý qajet. Mundaı uıymdardyń tolyq tizimimen jáne olardyń baılanys telefondary jóninde aqparatpen gorses-astana.kz QR DSM MSEQKD saıtynan «Astana qalasynda dezınsektsııa jáne deratızatsııa jumystaryn ótkizetin profdezuıymdar» bóliminen tanysýǵa bolady.
