Elordada kelýshilerge qorqor usynǵan meıramhanalar anyqtaldy
NUR-SULTAN. QazAqparat - Elordada karantın rejımin buzyp, tyıym salynǵan qorqordy kelýshilerge usynǵan meıramhanalar anyqtaldy, dep habarlaıdy QazAqparat qala ákimdigine silteme jasap.
Elorda ákimdiginiń mobıldi toby kezekti reıd kezinde kelýshilerge qorqor usynǵan birneshe mekemeni anyqtady. Endi olarǵa sanıtarlyq normalar men erejelerdi buzǵany úshin ákimshilik jaýapkershilik júkteledi. Quqyq qorǵaý organdary, sanıtarlyq-epıdemıologııalyq qyzmetkerler men BAQ ókilderinen turatyn mobıldi toptyń birinshi sapary «Máskeý» bıznes-ortalyǵynyń ǵımaratynda ornalasqan meıramhana boldy.
Aıta ketý kerek, meıramhanaǵa kelýshiler men ákimshilik epıdemıologter men polıtseılerge qorqordy qoǵamdyq oryndarda qoldanýǵa tyıym salynǵanyn bilmegenin aıtyp aqtaldy.
«Atalǵan mekeme boıynsha quqyq buzýshylyq tirkeldi. Karantın rejımin saqtamaı, ereje buzylǵan. QR Bas sanıtarlyq dárigeriniń qaýlysyna sáıkes, qoǵamdyq oryndarda qorqor shegýge tyıym salynady. Bul jaǵdaıda mekeme ákimshiliginiń áreketi QR ÁQBtK-niń 463-babyna, 3-bólimine jatady», - dedi Esil aýdandyq taýar men kórsetilgen qyzmetterdiń sapasyn baqylaý basqarmasynyń basshysy Arman Qurbanov.
Karantın kezinde R.Qoshqarbaev kóshesinde ornalasqan meıramhanalardyń birinen toptalyp, qorqor shegip otyrǵan adamdar anyqtaldy. Meıramhanada kóp adam áleýmettik qashyqtyq saqtamaǵan jáne jeke qorǵanys quraldary bolmaǵan.
Esterińizge sala keteıik, buǵan deıin Nur-Sultanda sanıtarlyq normalardy saqtamaǵany úshin 120 nysan jabyldy, onyń ishinde qurylys kompanııalary da bar. 150 kásiporyn eskertý aldy, bir bóligine aıyppul salyndy.
Mobıldi top músheleriniń aıtýynsha, nysandar koronavırýs ınfektsııasynyń taralýyna jol bermeý maqsatynda qabyldanǵan sanıtarlyq-epıdemıologııalyq normalardyń qatań saqtalýyn qamtamasyz etpeıinshe, jumys istemeıdi.
Mamandardyń aıtýynsha, qorqor – ınfektsııa kózi. Sondyqtan mundaı jaǵdaıda ólim qaýpi joǵary. Qorqor aýa-tamshy jolymen beriletin juqpaly aýrýlardyń taralý kózi bolýy múmkin. Ákimdiktiń mobıldi toby polıtseılermen jáne epıdemıologtermen birlesip kún saıyn sanıtarlyq normalardyń saqtalýyna reıd júrgizedi.
Aıta ketý kerek, astanada maska taǵý rejımi saqtalýda. Eger kásiporyndar men qala turǵyndary sanıtarlyq normalardy saqtamasa, qala karantındegi qatań rejımge qaıta oralýy múmkin.
FOTO/ Baýyrjan Jýasbaev
