Elordada kelesi jyldan bastap qoljetimdi baspana qurylysy 3 esege artady
NUR-SULTAN. QazAqparat - Nur-Sultanda qoljetimdi baspana boıynsha salynatyn turǵyn úı qurylysynyń sany úsh esege ósedi.
Bul týraly búgin qala ákimi Altaı Kólginov Memleket basshysy Qasym-Jomart Toqaevtyń Qazaqstan halqyna Joldaýyn talqylaýǵa arnalǵan qalalyq aktıv jıynynda málim etti, dep habarlaıdy elorda ákimdiginiń resmı saıty.
«Elordada turǵyn úı kezegine turýshylardyń sany jyl saıyn artyp keledi. Bıyl jaz aıynyń basynda 46 myń astanalyq úı kezeginde tursa, qyrkúıekte bul kórsetkish 47,5 myńǵa jetip otyr. Osyǵan qaraı kelesi jyldan bastap qoljetimdi baspana boıynsha salynatyn turǵyn úılerdiń kólemi 3 esege artatyn bolady. Búginde daıyndyq jumystary bastaldy», - dedi elorda ákimi Joldaýdy talqylaýǵa arnalǵan jıyn barysynda.
Onyń sózinshe, úı kezeginde turǵan az qamtylǵan jáne kópbalaly otbasylardy baspanamen qamtamasyz etý kún tártibindegi mańyzdy másele.
«Biz bar salmaqty bıýdjetke salǵymyz kelmeıdi. Sondyqtan qoljetimdi baspanany jeke ınvestıtsııalar esebinen júzege asyrýdy kózdep otyrmyz. Jaqynda ǵana taǵy bir turǵyn úı salý kombınatynyń óz jumysyn bastaǵanyn bilesizder. Qoljetimdi baspanamen qamtýdyń basty segmengti retinde osy kombınatty qarastyryp otyrmyz», - dedi Altaı Kólginov.
