Elordada Qazposhta sálemdemelerin urlaǵan kúdikti ustaldy
NUR-SULTAN. QazAqparat – Nur-Sultan qalasy polıtsııa departamentiniń «Saryarqa» aýdandyq polıtsııa basqarmasyna «Qazposhta» AQ qoımasynan sálem-saýqattardyń urlanyp júrgeni týraly shaǵym kelip tústi, dep habarlaıdy QazAqparat elordanyń polıtsııa departamentine silteme jasap.
Jedel-izdeý sharalaryn júrgizý barysynda qylmysty jasady degen kúdikke ilingen azamat anyqtalyp, ustaldy.
Ol elordanyń buryn sottalǵan 27 jastaǵy turǵyny bolyp shyqty. Jaýap alý kezinde ol qoımaǵa talaı ret kirgenin, alaıda kúzetshilerdiń oǵan nazar aýdarmaǵanyn aıtty. Sonda ol urlyq jasamaq nıetpen qoıma bólmesine esh kedergisiz kirip, odan úsh sálemdemeni urlaǵan.
Ol sálemdemeniń ekeýin jasyryp, ishinde Toıota Kamrı avtokóliginiń qosalqy bólshekteri jatqan úshinshi sálemdemeni beıtanys bireýge satqan.
Tabylǵan sálemdemeler «Qazposhta» AQ-ǵa qaıtaryldy.
Atalǵan faktimen QR Qylmystyq kodeksiniń 188-babymen («urlyq») sot aldyndaǵy tergeý amaldary júrgizilip jatyr.
