Elordada «Qazirgi zamanǵy sóz energııasy» atty ádebı forým ótýde
ASTANA. QazAqparat - Elordadaǵy Táýelsizdik saraıynda «Qazirgi zamanǵy sóz energııasy» atty halyqaralyq ádebı forým jumysyn bastady. Sharanyń ashylý rásimine QR Mádenıet jáne sport mınıstri Arystanbek Muhamedıuly qatysyp, sóz sóıledi, dep habarlaıdy QazAqparat tilshisi.
«Qazaq ádebıetiniń búgingi qal-ahýaly barshamyzdy alańdatatyny daýsyz. «El ádebıetin qaıtsek álemge tanytamyz?» degen másele barshamyzǵa ortaq. Endeshe túrli memleket ókilderimen mádenı jáne ádebı baılanys ornatý maqsatynda ótkizilip otyrǵan búgingi sharanyń orny erekshe. Tarıhqa kóz júgirtsek, mundaı aýqymdy shara elimizde sońǵy ret 1973 jyly ótken. Araǵa jarty ǵasyrǵa jýyq ýaqyt salyp el ordasy - Astana forýmy qonaqtaryna qushaǵyn aıqara ashyp otyr», - dep atap ótti mınıstr.
Osy rette ol Elbasy N.Nazarbaevtyń «Rýhanı jańǵyrý» baǵdarlamalyq maqalasy aıasynda ótip otyrǵan forýmǵa Eýrazııa qurlyǵynyń beldi qalamgerleri shaqyrylǵanyn basa aıtty.
«Óz kezeginde jańa zamandaǵy álem ádebıetiniń kórnekti ókilderin el ordasy - Astanada qarsy alý ultymyz úshin úlken abyroı jáne zor jaýapkershilik! Osy rette, Memleket basshysynyń «Álem bizdi qara altynmen nemese syrtqy saıasattaǵy iri bastamalarymyzben ǵana emes, mádenı jetistikterimizben de tanýy kerek» degen qanatty sózin taǵy bir eske alýdy jón kórip otyrmyn. Búgingi shara, mádenıetimiz ben ádebıetimizdi álem jurtshylyǵyna tanystyrý úshin berilgen birden-bir múmkindik»,- dedi mınıstr.
Osy oraıda Arystanbek Muhamedıuly Mádenıet jáne sport mınıstrliginiń atynan jáne óz atynan forýmnyń ótýine atsalysqan, elimizdegi eń alǵashqy jáne eń iri shyǵarmashylyq birlestikterdiń biri - Jazýshylar odaǵyna úlken rızashylyn bildirdi. Sonymen qatar forýmǵa qatysýshylarǵa jáne onyń jumysyna sáttilik tiledi.
