Elordada Qajymuqan Muńaıtpasov atyndaǵy stadıondy áli súrip jatyr
ASTANA. KAZINFORM – Eski stadıondy súrý jumysy jalǵasyp jatyr. Oqıǵa ornynda Kazinform agenttiginiń fototilshisi bolyp keldi.
Elorda ákimdiginiń málimetinshe, tehnıkalyq tekserýlerge sáıkes, stadıonnyń qoldanystaǵy stendteri qulaý aldynda turdy. Osyǵan baılanysty qaıta jańǵyrtpaı, tolyq bólshekteý jáne jańa stadıon salý josparlanǵan. Sondyqtan qurylys-montaj jumystary sozylyp otyr.
Jańa joba boıynsha aýdany 7140 sharshy metr bolatyn, kólemi 105 m h 68 m oıyn alańy bar UEFA standartynyń 3-sanatyndaǵy 4500 oryndyq stadıon salý josparlanǵan.
- Jabyq úlgidegi jobany iske asyrý týraly sheshim qabyldanyp, jobalaý jumystary uıymdastyryldy. Qazirgi ýaqytta eskızdik joba ázirlenip jatyr. Kelisimdi alǵannan keıin jabyq úlgidegi stadıonnyń eskızdik jobasy memlekettik saraptama portalyna júkteledi. Memlekettik saraptamanyń oń qorytyndysyn alǵannan keıin ǵımarattyń qurylysy boıynsha jumystar bastalady, - dep túsindirdi Astana qalasynyń ákimdiginen.
Eske sala ketsek, 2021 jyly elordadaǵy Qajymuqan Muńaıtpasov atyndaǵy eski stadıonnyń apattyq jaǵdaıda turǵany aıtyldy.
Al byltyr aqpanda stadıonnyń ornyna jańa jabyq sport kesheni boı kóteretini belgili boldy.