Elordada «KAZGRAIN-2012» astyq forýmy óz jumysyn bastady

Alqaly jıynǵa qatysýshylardyń aldynda sóz sóılegen QR Premer-Mınıstriniń orynbasary Qyrymbek Kósherbaev keıingi jyldary qazaqstandyq astyq qoryn turaqty ótkizý oń jolǵa qoıylǵandyǵyn aıta kele: «Munda astyq óndirisi salasynyń óte mańyzdy máseleleri talqylanady jáne ony ári qaraı damytýǵa septigin tıgizetin usynystar qabyldanady. Búgingi bolatyn kezekti astyq forýmynda da buǵan qatysýshy elderdiń arasyndaǵy yntymaqtastyqty nyǵaıtý, azyq-túlik qaýipsizdigin qamtamasyz etý máselelerin sheshý, Agroónerkásip keshenin damytý jónindegi múmkindikter týyndaıtynyna senimdimiz»,-dedi.

Mańyzdy basqosýǵa 250-ge jýyq adam qatysýda. Olardyń qatarynda dándi daqyldardy ósirýge ári eksporttaýǵa mamandandyrylǵan otandyq jáne sheteldik kásiporyndardyń, salalyq, memlekettik vedomstvolardyń, damý ınstıtýttary men saqtandyrý kompanııalarynyń ókilderi astyq salasyndaǵy jergilikti jáne sheteldik sarapshylar, aýyl sharýashylyǵy taýarlaryn óndirýshiler bar.

Aıta keterligi, forým álemdik naryqta otandyq astyqqa degen suranysty arttyrý, eksporttaýshylar men ımporttaýshylardyń arasynda yntymaqtastyq baılanysty ornatý maqsatynda uıymdastyryldy.