Elordada qazannyń 1-inen bastap JRVI-ge shaldyǵýshylar sanynyń ósýi baıqalady

Bul týraly búgin Astana ákimdiginde ótken dóńgelek ústel barysynda QR Densaýlyq saqtaý mınıstrliginiń Memlekettik sanıtarlyq epıdemıologııalyq komıteti Astana qalalyq departamenti dırektorynyń orynbasary Sarqyt Bısenova málim etti.

«Qazan aıynyń basynan beri elordada JRVI-ge shaldyǵýdyń 6759 oqıǵasy tirkeldi. Jalpy syrqattanǵandardaǵy 14 jasqa deıingi balalardyń úlesi 75,4 paıyzdy (5099 oqıǵa) quraıdy. Ótken jyldyń sáıkes kezeńimen salystyrǵanda syrqattanýshylardyń sany 1,3 paıyzǵa tómendeýi, al 14 jasqa deıingi balalardyń JRVI-men aýyrǵandarynyń sany 16 paıyzǵa óskendigi baıqalady. 259 adam aýrýhanaǵa jatqyzyldy. Aǵymdaǵy kezeńde tumaýǵa shaldyqqandar tirkelgen joq», - dedi ol.

Onyń atap ótýinshe, kórshi elderde vırýstyq ınfektsııanyń maýsymdyq ósimi baıqalýda. Máselen, Reseıdiń 21 sýbektisinde, Ýkraınanyń keıbir oblystarynda syrqattanýshylardyń ósip otyrǵandyǵy baıqalýda. «Osyǵan oraı aýrýdyń odan ári órshýine jol bermeý úshin daıyn bolýymyz kerek», -deıdi S.Beısenova.

Sondaı-aq DDU-nyń A(N1N1) pandemııalyq tumaýynyń taralý qaýpiniń 6-shy fazasy aıaqtaldy degen dereke súıengen ol: «Degenmen Qazaqstanda 2010-2011 jyldardaǵy maýsymda tumaýlyq emes respıratorlyq vırýstar taralyp, A N1N1 vırýstyq tumaýy jandana túsedi jáne V vırýsty tumaýy aınalymda bolady dep boljanýda», - dedi.