Elordada qazaqtyń úsh bıine jáne ál-Farabıge kóshe ataýy berilýi múmkin
NUR-SULTAN. QazAqparat – Nur-Sultan qalasy Tilderdi damytý jáne arhıv isi basqarmasynyń basshysy Tileýǵalı Qyshqashbaev elordadaǵy birqatar kóshege belgili tulǵalardyń esimin berý usynysyn Qoǵamdyq keńes músheleriniń aldyna qoıdy, dep habarlaıdy QazAqparat tilshisi.
«2019 jyldyń 3 qazanynda ótken Nur-Sultan qalalyq onomastıka komıssııasynyń otyrysynda elordamyzdyń 8 quramdas bóligine ataý berý týraly usynys qoldaý tapty. Birinshisi – ákimdikke joldanǵan Memlekettik hatshynyń «Qalamgerler alleıasyn» ashý týraly Ókimine sáıkes, Nur-Sultan qalasynyń Baıqońyr aýdanyndaǵy Abaı dańǵylynyń boıynda ornalasqan Álmuqan Sembınov kóshesinen bastalyp, Egemen Qazaqstan kóshesinde aıaqtalatyn ataýsyz alleıaǵa «Qalamgerler alleıasy» ataýyn berý týraly usynys», - dedi Tileýǵalı Qyshqashbaev.
Basqarma basshysy, ekinshiden, «Araı» saıabaǵyna «Jetisý» ataýyn berý týraly usynys qoldaý tapqanyn atap ótti.
«Úshinshiden, qala turǵyndary Raıymbek batyrdyń, qazaqtyń úsh bıi – Tóle, Qazybek, Áıteke bılerdiń, álem jáne Eýropanyń birneshe dúrkin chempıony Anatolıı Hrapatyıdyń esimimen kóshe ataý usynysyn bildirdi. Onomastıka komıssııasynyń otyrysynda ol usynys, sonymen birge Ábý Nasyr ál-Farabıdiń 1150 jyldyǵyna oraı ǵalymnyń atyna kóshe berý týraly usynys qoldaý tapty», - dedi ol.
Tileýǵalı Qyshqashbaev atalmysh usynystardy qalalyq Qoǵamdyq keńes músheleriniń talqysyna shyǵardy. Oǵan Keńes músheleri biraýyzdan qoldaý bildirdi.
Bul usynystar endigi kezekte qalalyq máslıhattyń qaraýyna joldanady.
