Elordada qazaqtyń uly aqyny ári oıshyly Abaı eskertkishi boı kóterdi
STANA. Maýsymnyń 19-y. QazAqparat /Marlan Jıembaı/ - Búgin elordada qazaqtyń uly aqyny ári oıshyly Abaı Qunanbaıulynyń eńseli eskertkishiniń ashylý rásimi ótti.
Sharaǵa QR Parlament Senatynyń Tóraǵasy Qasym-Jomart Toqaev, Májilis Tóraǵasy Oral Muhamedjanov, Astana ákimi Imanǵalı Tasmaǵambetov, QR Memlekettik hatshysy - Syrtqy ister mınıstri Qanat Saýdabaev, QR Prezıdenti Ákimshiligi basshysynyń orynbasary Máýlen Áshimbaev, Mádenıet mınıstri Muhtar Qul-Muhammed qatysyp, uly aqyn eskertkishinin aldyna gúl destesin qoıdy. Osydan keıin QR Parlament Senatynyń Tóraǵasy Qasym-Jomart Toqaev sóz sóılep, ultymyzdyń rýhanı aǵartýshysy, halqyna máńgi óshpes mura qaldyryp, qazaq ádebıetin álemdik deńgeıde moıyndatqan, maıtalman klassıgimiz Abaıǵa taǵzym etý biz úshin asa joǵary mártebe ekendigin basa aıtty.
Eskertkishtiń ashylý rásimine arnaıy kelgen uly aqynnyń jıeni, Abaı qorynyń dırektory Baltabek Ersálimov, «Abaı qazaq halqynyń kósemi, qazaq halqynyń bet-beınesi, qazaq halqynyń tólqujaty. Búgingi egemen elimizdiń búkil ıdeologııasy Abaıdyń ósıetimen, aqylymen, armanymen júrýi kerek», degen pikirin alǵa tartty. Sonymen qatar ol eskertkish kóńilinen shyqqandyǵyn aıtyp, «naǵyz Abaı atamdy óziniń halqymenen birge kele jatqanyn kórgendeı áser de boldym», deıdi.
Abaı men Beıbitshilik kóshelerinde boı kótergen uly aqynnyń eńseli eskertkishi stılobat, postament jáne músinnen turady. Monýmenttiń jalpy bıiktigi - 17,750 metr, al Abaı músininiń bıiktigi - 7,550 metr. Músindik kompozıtsııanyń barlyq elementteri bir qalypta ázirlenip, taza qoladan quıylǵan. Salmaǵy - 10 tonna. Eskertkish avtory - almatylyq músinshi Bolat Dosjanov.
Astana ákimdiginiń taratqan aqparatqa sáıkes, aqynnyń týǵan kúnine oraı jyl saıyn uıymdastyrylatyn Abaı oqýlary endi osy jerde ótetin bolady.
