Elordada qazaqtyń salt-dástúrleri men ádet-ǵuryptaryn dáripteýge arnalǵan baıqaý ótti

Sharaǵa qalanyń etnomádenı birlestikteriniń ókilderi qatysty, dep habarlaıdy Nur-Sultan ákimdiginiń resmı saıty.

Dástúrli baıqaýdy elordalyq Qazaqstan halqy Assambleıasy uıymdastyrdy.

«Bul Qazaqstan halqy Assambleıasynyń uıymdastyrýymen elordanyń basqa da etnostaryna arnalǵan baıqaýy. Túrli etnos ókilderi qazaqtyń salt-dástúrin, mádenıetin, ádet-ǵurpyn kórsetti. Qatysýshylar qazaq tilin meńgerý deńgeıin kórsetip, teatrlandyrylǵan kórinister qoıdy. Sol sııaqty Jambyl Jabaevtyń 175 jyldyǵyna oraı aqynnyń óleńderin jatqa oqydy. Baıqaý dástúrli túrde jyl saıyn ótkiziledi», - dedi Nur-Sultan qalasy ákimdigi janyndaǵy «Qoǵamdyq kelisim» KMM basshysynyń orynbasary Núrken Ábdiǵalı.

Aldymen qatysýshylar tusaýkeser, toqymqaǵar, belkóterer sııaqty qazaqtyń salt-dástúrlerin kórsetti. Ekinshi kezeńde túrli aspaptarda ulttyq ánder oryndalsa, sońǵy kezeńde Jambyl Jabaevtyń shyǵarmalary jatqa aıtyldy.

Birinshi týrdyń jeńimpazy ózbek etnomádenı ortalyǵy boldy, ekinshi oryndy «Dala ólkesi kazaktarynyń odaǵy», al úshinshi oryndy «Vaınah» sheshen-ıngýsh etnomádenı ortalyǵy ıelendi.

Baıqaýdyń ekinshi án kezeńinde «Vaınah» sheshen-ıngýsh etnomádenı ortalyǵyna teń keler eshkim bolmady, tóreshiler kúmisti «Jaıhýn» qaraqalpaq etnomádenı birlestigine berdi.

Jambyl Jabaevtyń shyǵarmalaryn mánerlep oqý baıqaýynda «Vaınah» sheshen-ıngýsh etnomádenı ortalyǵy birinshi oryndy, ekinshi oryndy «Jaıhýn» qaraqalpaq etnomádenı birlestigi, úshinshi oryndy «Aqbozat» bashqurt etnomádenı birlestigi ıelendi.

«Elordalyq Dostyq úıinde 22 etnomádenı birlestik jumys isteıdi. Bárimiz tatý ómir súremiz. Mundaı baıqaýda dástúrlerdi dáriptep, jastarǵa nasıhattaımyz. Búgin biz ekinshi júldeli orynǵa ıe boldyq», - deıdi «Dala ólkesi kazaktary odaǵynyń» múshesi, 73 jastaǵy Shárıpa Jetpisbaeva.

«Men Jambyl Jabaevtyń «Ósıet» óleńin mánerlep oqydym. Baıqaý qatty unady. Qazylar alqasy ónerimdi joǵary baǵalap, birinshi oryn berdi. Aldaǵy ýaqytta budan da bıik shyńdardy baǵyndyrǵym keledi», - deıdi 8 jasar Mansur Mateev.

Aıta ketý kerek, is-shara sanıtarlyq normalar men karantın talaptaryn saqtaı otyryp ótkizildi.