Elordada qazaqtyń marqasqa uly Mustafany eske aldy

Elordadaǵy Nazarbaev ortalyǵynda ótken «Qazaqstan-Túrkııa dostyq keshi» atty kontsert Mustafa týraly derekti fılmnen bastaldy.

Beınekórinisterde Mustafanyń ata-babalary, ósken ortasy jóninde aıtylady, onyń kıno ónerindegi tabystary, Túrkııadaǵy sporttyq joly, Qazaqstanǵa kelip, elimizde taekvondo mektebiniń negizin qalaǵany jóninde baıandalady.

Óner keshine jınalǵandar aldynda Mırmar-Sınan kórkemóner ýnıversıtetiniń professory, tarıh ǵylymdarynyń doktory Ábdiýaqap Qara kirispe sóz sóılep, Túrkııadaǵy baýyrlardyń ystyq sálemin jetkizdi. «Bizge Qazaqstannan óner ujymdary kelip, kontsert qoıyp júr. Al túrkııalyq qazaqtardyń atajurtyna arnaıy shaqyrylyp, ózderiniń ánderi men kúılerin oryndaýy alǵash ret bolyp otyr. Mádenı sharany joǵary deńgeıde ótkizýge qoldaý jasaǵan Astana qalasynyń ákimi Imanǵalı Tasmaǵambetov myrzaǵa úlken rızashylyǵymyzdy bildiremiz. Sondaı-aq Túrkııa qazaqtarynyń kúılerin zerttep, Qazaqstanǵa jetkizýde jáne osyndaı dostyq kontsertin uıymdastyrýda Mádenıet qaıratkeri, sazger Nurlan Bekenovtiń eńbegi zor»,- dedi Ábdiýaqap Qara myrza.

Óner keshinde shyrqalǵan ánder men oryndalǵan kúılerdi Astana qalasy memlekettik fılarmonııasynyń Qazaq halyq aspaptary orkestri súıemeldep otyrdy.

Nurlan Bekenovtiń dırıjerlik jasaýymen orkestr «Telkúreń attyń júrisi» degen jáne basqa halyq kúılerin, Mirjaqyp Dýlatovtyń «Áýez» kúıin oryndady.

Qıyn-qystaý kezeńde elimizdiń shyǵys óńirinen Qytaı, Úndistan arqyly Túrkııaǵa barǵan óner ıesi Sarmollanyń kóptegen kuıleri saqtalǵan eken. Sonyń biri «Jorǵa aıý» kúıin kórermender orkestrdiń oryndaýynda tyńdady.

Osy kontsertke arnaıy shaqyrylǵan Túrkııadaǵy qazaq qoǵamynyń mádenıet bóliminiń meńgerýshisi Beshir Ahmet Kóse, sondaı-aq óner ıeleri Sedat Solaquly, Erjan Tunjer atajurtqa degen ystyq sálemderin áserli ánderimen jetkizdi. Sedat Solaquly halyq kúıi «Qara jorǵany», Nurǵısa Tilendıevtiń «»Álqıssasyn» dombyramen oryndap, kórermenderdiń yqylasyna bólendi. Al Beshir men Erjan túrkııalyq qazaqtardyń, onyń ishinde Mustafa Óztúriktiń súıip tyńdaıtyn «Saǵyndym», «Sizdi qalaı umytaıyn» degen lırıkalyq ári oınaqy ánderdi naqyshyna keltire oryndaǵanda, tyńdarman qaýym qol soǵyp, qoshemet kórsetip otyrdy. Sodan keıin Beshir men Erjan «Atajurtym - Qazaqstan» atty jańadan týǵan ándi alǵash ret oryndap berdi.

Bul kontsertte Mustafa Óztúriktiń sózine jazylǵan Ǵanı Makınniń «Juldyzdardy tileısiń be?» atty ánin respýblıkalyq konkýrstardyń laýreaty, ánshi Nuraı Tanabaev shyrqady. «Shymyrlap boıǵa jaıylǵan» ánniń yrǵaǵy kórermenderdiń júrek qylyn shertip, jan tebirenisine bóledi.

Eki eldiń dostyǵyn pash etken kontsertte sonymen qatar otandastarymyz QR eńbek sińirgen qaıratkeri, professor, dombyrashy Orynbaı Dúısen kúı shertse, QR eńbek sińirgen qaıratkeri, ánshi Gúlzıra Bókeıhan «Aǵajaı-Altaı» ánin oryndady. Sondaı-aq halyqaralyq baıqaýlardyń laýreaty Janar Júsipova halyq kúıi «Ertis tolqynyn» qobyz sazymen jetkize bilse, respýblıkalyq konkýrstardyń laýreaty, belgili ánshi Zaǵıpa Imanǵazy sahna tórine Túrkııa qazaqtarynyń «Eski dostar» ánimen shyqty. Ánshi Danııar Muqannyń oryndaýynda «Isanyń jeldirmesi» sátti shyqty.

Álemge áıgili sport sheberi, Qazaqstanda taekvondo mektebiniń negizin qalaýshy Mustafa Óztúriktiń 60 jyldyq mereıtoıyna arnalǵan kontsert barysynda qazaqtyń jas qyran taekvondoshylary da óner kórsetti. Kezinde Mustafa Óztúrik negizin qalaǵan Almatydaǵy taekvondo mektebine Qaırat Qyrǵyzbaev jetekshilik etse, Atyraýdaǵy mektepke Qabıbek Muhıtov basshylyq jasaıdy. Osy azamattardyń shákirtteri el aldyna shyǵyp, «Mustafa!» dep urandap, shyǵys jekpe-jeginiń keremet úlgilerin kórsetti.