Elordada qazaqtyń bulbul ánshisi Bıbigúl Tólegenovanyń shyǵarmashylyq keshi ótti
ASTANA. 20 qańtar. QazAqparat /Jasulan Amanbaıuly/ - Búgin Astanadaǵy «Qazaqstan» Ortalyq kontsert zalynda Keńes Odaǵynyń halyq ártisi, Sotsıalıstik Eńbek Eri, Memlekettik syılyqtardyń laýreaty, akademık Bıbigúl Tólegenovanyń «Gaýhartas» atty shyǵarmashylyq keshi ótti.
Kesh baǵdarlamasyna álemdik klassıkalyq opera men halyq ánderinen 30-ǵa jýyq shyǵarmalary engen. Kontsert barysynda qazaqtyń kúmis kómeı, jeztańdaı ánshisi Bıbigúl Tólegenova Dj. Pýchchınıdiń «Djannı Skıkkı» operasynan Laýretta, Ǵ.Jubanovanyń «Eńlik-Kebek» operasynan Eńliktiń arııasyn, sondaı-aq «Gaýhartas», «Aqqý edim kóldegi», «Baıanjan», «Jelsiz túnde jaryq aı», «Ahaý, úrııa-aı!» syndy qazaq halyq ánderin naqyshyna keltire oryndady.
«Qazaqtyń bulbuly» atanǵan óner sańlaǵynyń keshinde ánshiniń ózimen qatar shákirtteri Gúljanat Sapaqova, Elena Nızamýtdınova, Dana Talasbekova, Marjan Tórehanova, Tolqyn Zabırovanyń oryndaǵan ánderin elorda halqy yqylaspen tyńdap, zor qoshemet kórsetti.
Bıbigúl Tólegenova - álemdik deńgeıdegi ánshi, opera juldyzy. Ol - óziniń ónerdegi asa joǵary jetistikteri úshin ǵana emes, halyq arasynda úlken súıispenshilikke ıe bolǵandyqtan da halyq ártisi atanǵan jan.
Bıbigúl Ahmetqyzyn álemniń áónersúıer qaýymy árqashan qushaq jaıa qarsy alady. Onyń ánderine Nıý-Iorktyń, Londonnyń, Parıjdiń, Rımniń, Afınynyń, Tokıonyń, Seýldiń, Kaır men basqa da álemniń iri qalalarynyń aıtýly kontsert zaldaryna jınalǵan jurt tamsana qol soqqan. Halyq ártisi álemniń eń úzdik orkestrlerimen: Osıpov atyndaǵy orys ulttyq akademııalyq ult aspaptar orkestri, Chaıkovskıı atyndaǵy úlken sımfonııalyq orkestri, prınts Ýelskııdiń (Ulybrıtanııa) kameralyq orkestrimen birge án salǵan.
ıÝNESKO sheshimi boıynsha Bıbigúl Tólegenova XX ǵasyrdyń uly jıyrma áıelderiniń qataryna engen bolatyn.
