Elordada qazaqtyń baıyrǵy ómir saltyn pash etetin kórme ashyldy
ASTANA. KAZINFORM – «Usta murasy: sheberlik pen dástúr» atty kórmege sýretshi-sheber, zerger, restavrator Erǵazy Isataevtyń 90 týyndysy qoıylǵan.
Jádigerler teri, súıek, temir, jez, aǵash t.b. materıaldardan jasalǵan. Qarý-jaraq túrleri, ydys-aıaqtar, turmystyq buıymdar, árqıly quraldar, besik, oshaq t.b. zattar kórme qonaqtaryn bir sátke kóshpeli ǵumyr keshken dáýirge aparǵandaı boldy.
Ásirese, jylqy músini kópshiliktiń nazaryn aýdardy. Ondaǵy at ábzelderi – Qaraǵandy oblysynyń Qarqaraly aýdanyndaǵy b.z.d. VII-VI ǵasyrlarǵa tıesili Taldy-2 qorymynan tabylǵan buıymdardyń restavratsııasy.
– Bul jumysty eki aıda jasadym. Aldymen plastmassadan attyń qańqasyn daıyndadym. Sodan soń, jylqyny soıyp, terisin, tuıaǵyn, qulaǵyn, jalyn, quıryǵyn osy músinge kıgizdim. Teri ishinen tuzdalǵandyqtan, buzylmaı, saqtalady. Al Taldy-2 obasynan tabylǵan túpnusqa er-turman men at ábzelderi, negizinde, altyn bolǵan. Restavratsııasynda biz altyn tústes boıaýmen boıadyq, – dedi E.Isataev.
Sondaı-aq XVIII-XIX ǵasyrlarda batyrlar kıgen saýyttyń rekonstrýktsııasyna da kórme qonaqtary aıryqsha mán berdi.
– Kireýke men dýlyǵa óte kúrdeli tehnologııamen jasaldy. Tós tusyndaǵy oq ótpeıtin bolat sharaınaǵa órnek salý óte qıyn sharýa. Al usaq-usaq temir shyǵyrshyqtardy bir-birine kıgizip, berendi órý – shuqyma jumys. Ónerdegi 50 jyl ishinde eń uzaq ýaqyt alǵan týyndym – osy. Bir jylda daıyndadym. Qazaqstanda mundaımen 1-2 sheber ǵana aınalysady. Óıtkeni saýyt jasaý asqan yjdaǵat pen tabandylyqty talap etedi, – deıdi kórme avtory.
Aıta keteıik Erǵazy Isataevtyń buǵan deıin ondaǵan kórmesi uıymdastyrylǵan. Jumystary Frantsııa, Kýveıt, Oman, Túrkııa, Reseı tárizdi shetelderde de qoıylǵan.
Al bul kórmesi Astanadaǵy QR Ulttyq mýzeıinde 20 sáýirge deıin ashyq bolmaq.
Eske salaıyq buǵan deıin «Attyń jalynda» degen ataýmen óner kórmesi ótkenin jazǵanbyz.
