Elordada qazaqtan shyqqan dańqty qolbasshy Baýyrjan Momyshulynyń 100 jyldyq mereıtoıyna arnalǵan eske alý keshi ótti
Mádenı keshtiń shymyldyǵyn ashqan QR Memlekettik syılyǵynyń laýreaty, jazýshy Mekemtes Myrzahmetuly «soǵys bastalǵan kezde bizdiń qazaq halqynyń ulttyq sanasy janshylǵan, ulttyq sanasynan aıyrylýǵa taqaǵan, óziniń ulty týraly maqtana almaıtyn bolatyn. Biraq Baýkeńniń erliginen keıin búkil qazaq serpilip, ulttyq ıdeıanyń oıanýy da sol kezden bastaldy. Bul - tarıhı shyndyq. Ekinshiden, halyqtyń tarıhı jady degen bolady. Tarıhı jady óshirilgen ol máńgi qul, ony basqarý ońaı. Biz tarıhı jadymyzdan aıyrylyp baryp, pushpaǵyn ustap qalǵan elmiz. Mine sol tarıhı jadtyń oıanýyna óziniń eńbekterimen, erligimen úlken jol salǵan Baýyrjan Momyshuly bolatyn», dep atap ótti.
Qalyń oqyrmannyń B.Momyshulynyń 2 tomdyǵyn ǵana biletindigin tilge tıek etken ǵalymnyń aıtýynsha, qazirgi ýaqytta onyń shyǵarmalar jınaǵynyń 30 tomdyǵy ázirlený ústinde. Sondaı-aq oǵan qosa Baýkeńniń zamandastary jazǵan estelikter men batyrǵa joldanǵan arnaý óleńderi engizilgen 10 tomdyq shyǵarmalar jaryq kórmek.
Ǵalymnyń sońyn ala sahna tórine kóterilgen B.Momyshulynyń kelini jazýshy Zeınep Ahmetova óziniń «Atanyń akademııasynan» tálim-tárbıe alǵandyǵyn aıta kelip, qazaqtyń batyr ulynyń 60 jasqa tolǵan kezde jazǵan bir shýmaq óleńin oqydy:
«Qadirin bilmeppiz ǵoı tiri kezde,
Dep jylar qalyń qazaq men ólgende.
Seksen men júzdigimdi urpaq atar,
Tarıhtyń túpkirinen sóz kelgende».
«Atanyń 80 jyldyǵynda Kremldiń temir qursaýly sandyǵynda jatqan altyn juldyzdy Memleket basshymyz julyp ákep, qazaq degen halyqtyń keýdesine taqqan bolatyn. Sonda halqymyz ádilettik qashan ornaıdy, batyrymyz ataǵyn qashan alady degen arman-tilegi oryndalyp, eńbek Elbasymyzdiki boldy. Bul - tarıhı shyndyq. Endi, mine, 100 jyldyq mereıtoıy da úlken belespen astarlasyp kelip otyr. Elimiz halyqaralyq úlken bedeldi uıymǵa tóraǵalyq etip jatyr. alda Jeńistiń 65 jyldyǵy. Bul Jeńis bizge ońaılyqpen kelmegen. Soǵystyń zardabyn tartpaǵan, soǵystyń órti shalmaǵan Qazaqstanda birde-bir otbasy bolmaǵan eken. Sondyqtan qazirgi kezde aramyzda júrgen qadaý-qadaý ardagerlerimizdi ardaqtaıyq. Óıtkeni bular bizge tábárik», dedi óz sózinde.
QR Mádenıet mınıstrligi Tilderdi damytý komıtetiniń uıymdastyrýymen ótken eske alý keshi kontserttik baǵdarlamamen jalǵasty.
