Elordada «Qazaqstannyń kópultty palıtrasy» kórmesi ótýde
Elimizde ónerdiń damýynda kópultty faktordyń bolýynyń basty nátıjesi - Qazaqstan mádenıetiniń kórkemdik, stıldik, rýhanı ár alýandyǵyn dostyq qabyldaý men ishki túsinistiktiń bolýy.
«Qazaqstannyń kópultty palıtrasy» kórmesi Qazaqstan halqy Assambleıasynyń 20 jyldyǵyna oraılastyrylǵan. Ultaralyq toleranttylyq pen qoǵamdyq kelisim - bul kez-kelgen memlekettiń saıası ómirindegi eń ózekti taqyryptardyń biri.
Kórmeniń negizgi ıdeıasy - ulttardyń tatýlyǵyn, Qazaqstanda turatyn halyqtardyń beıbitshiligi men kelisimin beıneleý óneri arqyly nasıhattaý. Ekspozıtsııa elimizdegi beıneleý óneriniń hronologııasyna sáıkes, ár ult ókilinen shyqqan sýretshilerdiń shyǵarmalarynan negizin qalaýshylardan bastap qazirgi zamanǵy sýretshilerge deıin qoıyldy.
Búgingi tańda beıneleý óneri elimizde ózindik qoltańbasy, kórkemdik erekshelikteri, damý kezeńderi, qazirgi zaman ónerine qosatyn qaıtalanbas úlesi bar kórkemdik mektep bolyp qalyptasty.
Ulttyq kórmede 36 sýretshiniń 40-tan astam eńbegi kópshilik nazaryna usynylǵan.
Ulttyq ekspozıtsııaǵa qatysýshy sýretshilerdiń biri Achılov Ismaıl 5-synyptan bastap sýret salady. Ol kezde aýyldy jerde turǵandyqtan tıisti oqýlyqtar bolmady, áleýetin iske asyrýdyń jalǵyz joly kitaptardaǵy sýretterdi kóshirip salý edi. Ismaıl Achılov hırýrg, matematık bolýdy armandady. Degenmen, Tashkent ýchılışesine túsip, beıneleý óneri jáne kórkemsýret fakýltetin tańdady. Búginde sýretshi Astanadaǵy Qazaq Ulttyq óner ýnıversıtetinde dáris beredi. Ismaıl Achılov «Qazaqstannyń kópultty palıtrasy» kórmesiniń mańyzdylyǵy týraly aıtyp berdi:
- Bul jastardy tárbıeleýge kómektesedi. Jastar Qazaqstandaı beıbitshilik pen tynyshtyq ornaǵan elde bilim alǵysy keledi. Eńbek etseń mindetti túrde kózge túsesiń.
Kórmede sýreti qoıylǵan taǵy bir sýretshi - Gúlmıra Telǵozıeva.
- Bul qarapaıym bolyp kóriner, biraq men bala kezimnen sýret salyp kelemin. Sýretshi bolatynymdy bilip júrdim.
Sýretshiniń kartınalary barsha álem boıynsha galereıalarda kelýshiler nazaryna usynylǵan, shetelde suranysqa ıe. Búgingi kúni Gúlmıra Telǵozıeva elordalyq Oqýshylar saraıynda kórkemsýretten sabaq beredi.
- Bizdiń birligimiz ben qonaqjaılylyǵymyzdyń túp tamyry berekeli jerimizde jatyr. Qazaqstan jerinde baǵzy zamannan beri beıbitshilik ornaǵan. Mentalıtetimizde qatygezdik degen joq, dostyq pen tatýlyqqa jaqynbyz. Men árbir úıge beıbitshilik pen baqyt, sizderge jáne jaqyndaryńyzǵa densaýlyq tileımin. Barlyǵy jaqsy bolsyn.
Agrotehnıkalyq ýnıversıtette ónerden sabaq beretin sýretshi Vıktor Keldiń kartınalary da «Qazaqstannyń kópultty palıtrasy» kórmesine qoıylǵan.
Qazaq halyq óneri álem mádenıetiniń jaýharlary men ótken jáne osy ǵasyrdyń kórkemdik ınnovatsııalaryn ıgerý kezinde túrli kezeńderden ótti. Budan bólek, Qazaqstannyń beıneleý óneri kópulttylyǵymen erekshelenedi. Kórme qoǵamnyń birligi men onyń beıneleý ónerine áserin nasıhattaýǵa baǵyttalǵan.
Kórmege qazaq qoǵamynyń birligi taqyrybyn tereń ashatyn eń mańyzdy, qundy óner týyndylary shyǵaryldy. «Astana» galereıasy kelem deýshilerdi kún saıyn saǵat 10.00-16.00 aralyǵynda «Qazaqstannyń kópultty palıtrasy» kórmesine shaqyrady.
