Elordada Qazaqstannyń qazirgi tarıhyn zertteý metodologııasy taqyryby talqylandy
ASTANA. Naýryzdyń 17-si. QazAqparat /Rýslan Ǵabbasov/ - Búgin Astanadaǵy Memleket tarıhy ınstıtýtynda Elbasynyń Joldaýyn nasıhattaý máseleleri turyǵysynda «Prezıdenttiń Joldaýy jáne Qazaqstannyń qazirgi tarıhyn zertteý metodologııasy» taqyrybynda dóńgelek ústel ótti,
dep habarlaıdy QazAqparat.
Jıynnyń maqsaty -Táýelsiz Qazaqstannyń básekege qabilettiligin arttyrý jolynda Joldaýdyń ǵylymı teorııalyq negizin tereńdete zertteýdiń ádisin talqylaý. «Joldaýdy nasıhattaý barysynda jastar arasynda qazaqstandyq otansúıgishtikti nyǵaıtý men qazirgi tarıhı sanany qalyptastyrýdaǵy negizgi mindetterdi júzege asyrý jóninde túsiniktemeler beriledi»,-deıdi dóńgelek ústeldi uıymdastyrýshylar.
Shara barysynda tarıh ǵylymynyń doktory, professor H.M. Ábjanov «Qazaqstannyń qazirgi tarıhyn zertteý metodologııasy» taqyrybynda baıandama jasady. Sondaı-aq onda Memleket tarıhy ınstıtýtynyń jas ǵalymdary Teńgesh Qalenovanyń, Quralaı Sársembınanyń, Darhan Baıtileýdiń baıandamalary talqylandy.
