Elordada Qazaqstan jýrnalısterine arnalǵan «Jańa BAQ» atty modýldik oqytý bastaldy

Modýldik oqytý Tika Turkey, «QazAqparat» AQ jáne «Medıa damytý qorynyń» birlesken jobasy. Atalmysh shara «QazAqparat» Halyqaralyq aqparat agenttiginiń 100 jyldyǵyn atap ótý aıasynda ótkizilýde, dep habarlaıdy agenttik tilshisi.

Bes kún boıy Tika Turkey ókilderi áleýmettik jelilermen jumys daǵdylarymen bólisip, halyqaralyq buqaralyq aqparat quraldaryndaǵy jańalyqtar ekonomıkasy týraly baıandaıdy. Sharany TRT Istanbul Radiosu tsıfrlyq medıada kontentti basqarý mamany Hale Aıdomýsh júrgizedi.

Oqytý kezinde jýrnalıster úshin áleýmettik jeliler, halyqaralyq buqaralyq aqparat quraldaryndaǵy jańalyqtar ekonomıkasy, tsıfrlyq medıausynystar taqyryptary ortaǵa salynady. Oqytý túrik tilinde júrgizilip, qazaq tiline aýdarylady. Shara sońynda árbir qatysýshyǵa arnaıy sertıfıkat tabystalady.

Oqytýǵa «Qazaqstan» jáne «Habar» telearnalary, «Egemen Qazaqstan», «Astana aqshamy», «Azattyq rýhy», «Aıqyn» basylymdarynyń jáne «Qazkontent» AQ-nyń tilshileri qatysady.

Bul joba – jýrnalısterdiń teorııalyq jáne praktıkalyq bilimin arttyrýdyń jaqsy múmkindigi.

Tika Turkey – yntymaqtastyq jáne úılestirý boıynsha qyzmet etip, túrli is-sharalar: biliktilikti arttyrý kýrstaryn, trenıng, semınarlar ótkizetin, basqa salalarda da kómek kórsetetin túrik agenttigi. Onyń negizgi maqsaty – túrki elderiniń arasynda ekonomıkalyq, saýda, tehnıkalyq, áleýmettik, mádenı jáne bilim berý salasyndaǵy yntymaqtastyqty damytý.