Elordada «Qazaqstan Respýblıkasy memlekettik qyzmetshisiniń tildik portfeli» júıesiniń tusaýkeser rásimi ótti

Memlekettik til saıasatynyń negizgi maqsattarynyń biri qazaq tilin tolyqqandy til etý ekendigin atap ótken Mádenıet jáne aqparat mınıstrliginiń jaýapty hatshysy Janna Qurmanǵalıeva «birinshi kezekte memlekettik til - memlekettik organdardyń tili bolýy kerek» dedi. Onyń paıymdaýynsha, memlekettik tilge úıretý úshin eń mańyzdy alǵy sharttardyń biri tilge úıretý júıesi, ádistemelik bazasy bolýy qajet. «Sondyqtan Elbasymyz 2008 jyly bizdiń mınıstrlikke búgingi zamanǵa saı ınnovatsııalyq ádistemelerdi jasaý jáne engizý jóninde tapsyrma bergen bolatyn. Sol tapsyrmany júzege asyrý aıasynda aýqymdy jumystar jasaldy», dedi óz sózinde jaýapty hatshy.

J.Qurmanǵalıevanyń aıtýynsha, osy júıeni ázirleý úshin Sh.Shaıahmetov atyndaǵy Tilderi damytýdyń úılestirý-ádistemelik respýblıkalyq ortalyǵyna mınıstrlik tarapynan tikeleı tapsyrma berilip, soǵan oraı tıisti jumys toby qurylǵan. Atalǵan jumys tobyna elimizge belgili lıngvıst ǵalymdarmen qatar jas mamandar, sondaı-aq memlekettik organdarda memlekettik tilge úıretip júrgen mamandar qatysqan. «Olardyń atqarǵan aýqymdy jumystarynyń arqasynda búgin memlekettik qyzmetshiniń tildik portfeliniń tusaýyn kesip otyrmyz. Bul buryn sońdy elimizde jasalmaǵan aýqymdy, júıeli, tolyqqandy, jan-jaqty ádistemelik júıe. Onyń quramynda búgingi zamanǵa saı aýdıo, vıdeo sııaqty barlyq tehnologııalarmen qamtylǵan 19 oqý-ádistemelik qural bar», dedi ol.

Jaýapty hatshynyń aıtýyna qaraǵanda 1000 danamen jaryq kórgen bul júıe elimizdegi barlyq memlekettik tildi úıretý ortalyqtaryna, memlekettik jáne jergilikti atqarýshy organdarǵa tegin taratylmaq. Sonymen qatar júıe 1 jyl boıy arnaıy beıimdelý synaǵynan ótkiziletin bolady. Sonyń nátıjesine anyqtalǵan kemshilikteri, jumys isteý barysy, jetildiriletin tustary anyqtalmaq. «Synaq merzimi aıaqtalǵannan keıin paıdalanýshy óz pikirleri men usynystaryn júıeni ázirlegen ortalyqqa jiberedi. Sodan keıin 1 jyldyń ishinde atalǵan júıeni odan ári jetildirip, óte kólemdi danamen shyǵaryp, búkil suranysy bar uıymdarǵa taratatyn bolamyz», dedi J.Qurmanǵalıeva.