Elordada Qazaqstan men Ázerbaıjan syrtqy ister mınıstrlikteri konsýltatsııalar ótkizdi
ASTANA. QazAqparat - 2018 jylǵy 25 mamyrda Astana qalasynda Qazaqstan Respýblıkasy men Ázerbaıjan Respýblıkasy syrtqy ister mınıstrlikteri arasynda saıası konsýltatsııalar ótti, dep habarlaıdy QazAqparat QR Syrtqy ister mınıstrliginiń baspasóz qyzmetine silteme jasap.
Qazaqstan tarapyn syrtqy ister mınıstriniń orynbasary Ǵalymjan Qoıshybaev, Ázerbaıjan tarapyn syrtqy ister mınıstriniń orynbasary Halaf Halafov bastady.
Kezdesý barysynda basty nazar Qazaqstan Prezıdenti Nursultan Nazarbaevtyń 2017 jylǵy 2-3 sáýirdegi Ázerbaıjanǵa jasaǵan resmı sapary aıasynda qol jetkizgen ýaǵdalastyqtaryn júzege asyrý máselelerine salyndy.
Taraptar saıası, saýda-ekonomıkalyq jáne mádenı-gýmanıtarlyq salalardaǵy ekijaqty, kópjaqty yntymaqtastyq boıynsha jáne halyqaralyq kún tártibindegi ózekti máseleler jóninde pikir almasty.
Kelissózderdiń qorytyndylary boıynsha ekijaqty konsýltatsııalardyń júıeli túrde ótýiniń mańyzdylyǵy atalyp ótti.
