Elordada Qazaqstan memlekettiliginiń qalyptasýy týraly eńbektiń tusaýkeseri ótti
Týyndy Qazaqstannyń egemendik alýynyń tarıhı úderisine, táýelsizdiktiń baǵanaly tiregi bolǵan jeke ınstıtýttardyń qalyptasýy men jetilýine arnalǵan.
«Elbasy Nursultan Nazarbaev bastamashylyq etken qaıta qurý men reformalarǵa tikeleı qatysy bar memleket jáne qoǵam qaıratkerleri kitapty jazýǵa atsalysty. Kitap sonysymen qundy, sonysymen erekshe. Bular Qazaqstan táýelsizdiginiń alǵashqy onjyldyǵynda Tuńǵysh Prezıdentpen birge memlekettiń mańyzdy ınstıtýttary men salalaryn qurý jáne damytý jolynda eńbek etkender. Bul eńbek arqyly oqyrman egemen Qazaqstannyń damý kezeńderi, Elbasynyń ıdeıalary men nusqaýlarynyń qalaı júzege asqany týraly bile alady», delingen habarlamada.
«Kitap tarıhshylar, ǵalymdar men saıasattanýshylar úshin mańyzdy aqparat kózi bolyp tabylady. Sonymen qatar, kitaptyń jas urpaq úshin erekshe mańyzy bar dep sanaımyn. El táýelsizdiginiń alǵashqy onjyldyǵynda qandaı kezeńderdi bastan ótkergenin, jańa álemde jańa Qazaqstandy qurýda Elbasynyń qandaı irgeli ustanymdar men kózqarastardy basshylyqqa alǵanyn jastar bilýi tıis. Osylaısha, jastardyń kitapty oqýy týǵan ólkeniń tarıhyn bilýge, ony nasıhattaýǵa, jastar arasynda patrıotızmdi nyǵaıtýǵa yqpal etedi. Búgin tusaýy kesilgen eńbektiń basty qundylyǵy osynda jatsa kerek», - dedi saltanatty rásimde sóz alǵan QR Tuńǵysh Prezıdenti - Elbasy qorynyń atqarýshy dırektorynyń orynbasary Igor Rogov.
Tolymdy týyndy týraly Qazaqstan Respýblıkasy Konstıtýtsııalyq Keńesiniń tóraǵasy Qaırat Mámı de tushymdy pikir bildirdi. Bul rette, ol eldegi reformalarǵa qatysqan adamdardyń kitap jazýdaǵy mańyzdylyǵyn bylaısha atady: «Uly Napoleonnyń sózderi bar: «Biz tarıhshylar kóshirip jazatyn tarıhty jazamyz. Buǵan jol bermeý úshin tarıhty der kezinde baıytyp otyrý kerek».
