Elordada Qazaqstan — Qytaı dástúrli medıtsına ortalyǵy ashyldy
ASTANA. KAZINFORM — Astanada qytaıdyń dástúrli medıtsınalyq ádisteri arqyly emdeıtin ortalyq esigin ashty.
Dástúrli medıtsına ortalyǵynyń negizgi emdeý baǵyttary:
* aýtızm, DTsP, ZPRR, ZRR jáne basqa da nevrologııalyq buzylystary bar balalardy keshendi
júrgizý;
* ınsýlt pen júıke jaraqattarynan keıingi ońaltý;
* omyrtqa, býyn aýrýlaryn jáne sozylmaly aýyrsyný sındromdaryn emdeý;
* uıqynyń buzylýy, mazasyzdyq jáne sozylmaly sharshaý jaǵdaılaryn túzetý;
* allergııalyq, ımmýndyq jáne teri aýrýlaryna keshendi qoldaý kórsetý.
Astanadaǵy Sıan klınıkasy 2023 jyldan bastap patsıentterdi qabyldaı bastady, búgin jańa ǵımaratqa kóship otyr. Uıymdastyrýshylardyń aıtýynsha, medıtsınalyq kómekti joǵary bilikti dárigerler, sonyń ishinde Qytaıdan kelgen mamandar kórsetedi. Erekshe nazar halyqaralyq komandanyń úılesimdi jumysyna aýdarylady. Qytaılyq dárigerlermen qatar, QHR-da oqýdan ótken qazaqstandyq mamandar da qyzmet atqarady. Olar elimizdiń densaýlyq saqtaý júıesimen turǵyndardyń mentalıtetin jaqsy biletin jergilikti kásibı mamandar.
— Jańa ortalyq ǵımaraty 1 maýsym halyqaralyq balalardy qorǵaý kúni qarsańynda ashylyp otyr, barlyq qatysyp otyrǵan balany merekemen quttyqtaımyn. Qytaı men Qazaqstan — taýlar men ózender arqyly baılanysqan, tatý kórshi, dos ári áriptes el. Prezıdent Qasym-Jomart Toqaev pen tóraǵa Sı Tszınpınniń jetekshiligimen Qytaı men Qazaqstan arasyndaǵy jan-jaqty strategııalyq áriptestik jańa serpinge ıe, — dedi Densaýlyq saqtaý vıtse-mınıstri Tımýr Muratov ortalyqtyń ashylý saltanatynda.
Onyń aıtýynsha, Qytaı men Qazaqstannyń dástúrli medıtsına ortalyǵy Shensı ólkesiniń Halyq úkimetiniń Syrtqy ister basqarmasy men Shensı provıntsııasynyń dástúrli qytaı medıtsınasy basqarmasynyń basshylyǵymen jumys isteıdi.
Sıan qalasyndaǵy mı aýrýlaryn emdeýge arnalǵan dástúrli qytaı medıtsınasy aýrýhanasy men Qazaqstandaǵy «Sıan klınıkasy» kompanııasy birlesip salǵan. Shensı men Qazaqstan arasynda aýyl sharýashylyǵy, energetıka, logıstıka jáne basqa da sala boıynsha aýqymdy yntymaqtastyq ornaǵan.
— 2023 jyly Shensı ólkesiniń Sıan qalasynda Qytaı — Ortalyq Azııa sammıti ótti. Sammıt barysynda memleket basshylary dostyq qarym-qatynasty odan ári tereńdetý, ekonomıkalyq jáne saýda baılanysyn keńeıtý, ǵylym, bilim jáne gýmanıtarlyq yntymaqtastyqty nyǵaıtý arqyly Qytaı men Ortalyq Azııanyń ortaq taǵdyr qoǵamdastyǵyn birlesip qurýǵa úles qosý jóninde mańyzdy konsensýsqa qol jetkizdi. Bir aı buryn Sıan qalasynda Shanhaı yntymaqtastyq uıymyna múshe memleketterdiń densaýlyq saqtaý mınıstrleriniń segizinshi otyrysy ótti. Men Qazaqstan delegatsııasyn bastap, Sıandaǵy otyrysqa qatystym. Onda tótenshe jaǵdaılar medıtsınasynyń damýy, medıtsınalyq kómekti jetildirý, densaýlyq saqtaý salasyndaǵy tsıfrlyq tehnologııalardy paıdalaný jáne dástúrli medıtsınany ilgeriletý sııaqty negizgi taqyryptar talqylandy. Biz Qytaı men Qazaqstannyń dástúrli medıtsına ortalyǵynyń damýy azamattardyń ómir súrý sapasyn arttyryp, «Salaýatty Jibek jolyn» qalyptastyrýǵa yqpal etedi dep úmittenemiz, — deıdi mınıstrdiń orynbasary.
Aıta ketsek, elimizde dástúrli medıtsına ádisterin reglamentteıtin standart ázirlenedi.