Elordada «Qazaqstan hokkeıi» jýrnalynyń tusaýy kesildi

Bul hokkeı týraly egjeı-tegjeıli jazylǵan respýblıkadaǵy alǵashqy basylym.

Jýrnaldyń tanystyrylymy barysynda BAQ ókilderine suhbat bergen bas redaktor Maksım Kartashov Memleket basshysy aǵymdaǵy jylǵy Joldaýynda sportqa basa nazar aýdarǵandyǵyn jáne 30%-ǵa deıingi qazaqstandyqtar buqaralyq sportqa tartylýy qajettigin atap ótkendigin tilge tıek etti.

«Biz alǵashqylardyń biri bolyp Elbasynyń bastamasyn qolǵa alyp, osy jýrnaldy jaryqqa shyǵaryp otyrmyz. Onda hokkeı jankúılerlerine osy san qyrly sport túriniń barlyq jańalyqtarymen tanystyrmaq oımyz bar. Sondaı-aq osy basylym arqyly jasóspirimderdiń sportqa qyzyǵýshylyǵyn oıatyp, onyń barlyq balalar úshin qoljetimdiligin qamtamasyz etpekpiz», dedi ol.

Jýrnaldan elimizdiń jetekshi hokkeıshilerimen aradaǵy suhbattardy, olardyń ómirine qatysty materıaldar toptamalaryn, sport jańalyqtaryn oqýǵa bolady.

«Jýrnaldyń ózindik quny 1000 teńge shamasynda. Alaıda biz qarapaıym oqyrmanǵa da qoljetimdi bolýyn oılastyryp, baǵasyn 300 teńgeden satylymǵa shyǵaryp otyrmyz. Bastapqy taralymy 2000 dana. Bolashaqta ony 5000 danaǵa deıin jetkizý josparymyzda bar», deıdi jýrnaldyń bas redaktory M.Kartashev.

Sondaı-aq basylymnyń jaryq kórýine memlekettik organdardyń da qoldaý kórsetetine úmittenip otyrǵan bas redaktor jylyna 8 márte orys tilinde jaryq kóretin jýrnaldyń bolashaqta qazaq tilindegi nómiri de oqyrman nazaryna usynylýy múmkin ekendigin joqqa shyǵarmaıdy.