Elordada Qazaqstan halqy tilderiniń HІІ qalalyq festıvali bastaldy
A. Tamyzdyń 23-i. QazAqparat /Qanat Mámetqazyuly/ - Búgin elordada Qazaqstan halqy tilderiniń HІІ qalalyq festıvali óz jumysyn bastady. Uly Abaıdyń týǵan kúnimen oraılastyrylǵan shara Aqynnyń elordadaǵy eskertkishterine gúl shoqtaryn qoıyp, baba rýhyna taǵzym etýden bastaldy,
dep habarlaıdy QazAqparat.
«Qazaqstan halqy tilderiniń festıvalin ótkizý naýqandyq jumys emes. Basqarma tilderge, ásirese memlekettik tilge qatysty máseleniń eshqaısysyna beı-jaı qaraǵan emes. Al tilder festıvali bizdiń ǵana emes, qalamyzdaǵy barlyq basqarmalardyń, mekemelerdiń, qala berdi árbir azamattyń memlekettik til týraly esep berý aılyǵy bolýy tıis», - dedi Astana qalasy Tilderdi damytý basqarmasynyń bastyǵy Orazgúl Asanǵazy. Onyń aıtýynsha, jyldaǵy dástúr boıynsha festıval aıasynda memlekettik qyzmetkerler arasynda «Memlekettik til- memlekettik qyzmette» atty konkýrs, mektepke deıingi balalar arasynda «Kel balalar oqylyq!» atty balalar merekesin ótkizý kózdeledi. Al «Taǵzym men taǵylym» atty shara barysynda Baýyrjan Momyshuly, Jánibek pen Kereı han, Kenesary eskertkishteri aldynda keshter uıymdastyrylyp, babalar rýhyna taǵzym jasalady. Budan bólek, bıylǵy festıvaldiń ereksheligi «Tili birdiń - tilegi bir» atty qazaq tilin jetik meńgergen ózge ult ókilderiniń respýblıkalyq jastar forýmyn ótkizý kózdelgen.
