Elordada Qazaqstan halqy Assambleıasynyń jumysynda qalyptasqan ózindik dástúr bar
Kez kelgen mańyzdy sharalardyń basynda astanalyq Assambleıanyń qadirli aqsaqaly, «Vaınah» sheshen-ıngýsh mádenı ortalyǵynyń jetekshisi Salman Geroev júredi. Qalamyzda 3600-deı ıngýshter men sheshender turyp jatyr. 1990 jyldan beri jumys istep kele jatqan etnomádenı ortalyqtyń jumysy jolǵa qoıylǵan. Munda Hanıfa Matsıevanyń jetekshiligimen «Vaınah» bı ansambli jumys isteıdi. Júzden asa bıshisi bar bul ansambl qaladaǵy eń tanymal óner ujymy retinde qala sahnalarynda óner kórsetip júr. Bıshilerdiń eń kishisi tórt jasta bolsa, eresekteriniń aldy - 20-dan asqan jas jigitter men qyzdar. Taý halqynyń bılerin úıretetin úıirmege orys, ýkraın, qazaqtyń da talaı balasy qatysyp júrgenin aıta ketken jón.
Elordalyq «Dostyq» ortalyǵynda eń kórkem bezendirilgen orynnyń biri «Obereg» ýkraın birlestigine tán. Onyń tóraıymy Tamara Shırmerdiń basshylyǵymen ýkraındardyń etnıkalyq bútindigin, mádenıeti, ýkraın tili, ózindik sana-sezim, ulttyq ádet-ǵuryp pen ýkraındyqtardyń tarıhı Otanymen baılanysyn damytý men saqtaý baǵytyndaǵy jumysyn belsendi atqaryp keledi.
- «Obereg» ýkraın qoǵamynyń bastapqy baǵytynda jastarmen jumys birinshi oryndy qamtıdy. Birlestikte «Charıvnı Djerela» jastar qanatynda trenıng-klýb qyzmetin úzilissiz kórsetedi, onda qatysýshylar qoǵamdyq ómirdiń ártúrli kórinisterine baılanysty belsendi azamattyq baǵdar týdyrady.
2008 jyldyń aqpanynda «Ridne slovo» ýkraın jeksenbilik mektebi quryldy. Mektep muǵalimderi etnıkaaralyq qatynas mádenıetin, Ýkraına men Qazaqstandaǵy aıryqsha belgilengen kúnder men memlekettik meıramdar, halyqtyq kúntizbelik kezeńdegi meıramdary men tárbıelik máni bar is-shara ótkizedi, - dep qoǵam tóraıymy atqaryp júrgen qoǵamdyq jumystaryn qysqasha tujyrymdady. «Oberegtiń» óner ujymdaryn N.Lıtoshkonyń vokaldy-horeografııalyq ansambli, N.Zelenskıı atyndaǵy hor, «Zabava» balalar vokal toby men «Zadorınka» ansambli quraıdy. Birlestik qaıyrymdylyq máselelerine erekshe kóńil bóledi. «SOS balalar qalashyǵy Astana» qoǵamymen birlestik tyǵyz qyzmet jasap, kómek kórsetip keledi.
Maıdanger, qalamger, «Alef» evreı mádenı ortalyǵynyń jetekshisi Moıseı Goldberg - respýblıkamyzǵa keń tanymal ardaqty azamattardyń biri. «Az jasaǵan joqpyn, jýrnalıstik jolda talaı tulǵalarmen júzdesýdiń sáti tústi. Olardyń arasynda maıdangerlerdiń orny bólek. Qaıda júrsem de, qazaq jerinen attanǵan maıdangerlerdiń izin taýyp, erligin elge jetkizýdi jón sanadym. Meniń keıipkerlerim - erligimen de, óshpes dańqymen de tanylǵan tulǵalar. Árqaısysynyń syrtynda Otan úshin janyn pıda etken bizge belgisiz soldattardyń erligi tur. Meniń jazǵandarym mıllıondaǵan maıdangerdiń ómiri men óliminiń bir úzigi dep túsingen jón» dep shyǵarmashylyq ustanymyna adal bolǵan Moıseı Mıhaılovıchtiń taǵylymyn mundaǵylar da qadir tutady. Elordadaǵy «Dostyq» ortalyǵynda evreıler qoǵamy da laıyqty ornyn alady.
Bıyl astanalyq Assambleıa qataryna taǵy bir ortalyq qosyldy. Júzge tarta elordalyq qaraqalpaqtardan turatyn mádenı birlestiktiń jetekshisi - Tazabıke Álıeva. Bul etnomádenı birlestik elordalyq Assambleıa jumysyn tez ıgerip, qalyptasqan dástúrdi saqtaı otyryp, dostyq órnekterine taǵy bir aıshyqty arqaý bolyp jalǵasty.
- Assambleıa ultaralyq, konfessııaaralyq qarym-qatynastyń jarqyn úlgisi retindegi aıryqsha ınstıtýt ekenin aıtý kerek. Kóptegen mádenı ortalyqtardyń basyn qurap, beıbitshilk pen kelisimniń shyn qorǵaýshysy retinde kúnnen-kúnge joly aıshyqtalyp keledi, - deıdi koreı mádenı ortalyǵynyń ókili Roza Pak. «Bizder ulttyq rýhymyzdy túletýge serpin bergen, Qazaqstandaǵy barlyq etnos ókilderin bir ortaǵa jınap, qýatyn bir arnaǵa baǵyttaǵan Assambleıanyń alǵashqy qurylǵan kúnderi jadymyzda. Sodan beri bas qalamyzda ótken barlyq mádenı sharalardyń bel ortasynda júrmiz. Ózimizdiń jumysymyzben kórsete bildik, elordalyq koreıler bizge sendi, izimizge erdi. Qazaq jerinde tamyr jaıǵan koreılerdiń orta býyny ókilderiniń maqsaty - jastardyń júreginde «dostyq», «birlik» dep atalatyn memlekettiń turaqtylyǵyn bekitetin adamı uǵymdardy bekitip, ómirlik jolynda ony tý etip alǵa ozýyna jumys jasaý, oǵan qala ákimdigi barlyq jaǵdaıdy jasap otyr» deıdi R.Pak.
Orys, ýkraın, belarýs, polıak, nemis, uıǵyr, dúngen, armıan, grýzın, taǵy basqa da etnos ókilderi bir ortalyqta bas qosyp, elimizde jasap jatqan barlyq ult ókilderiniń yntymaǵy úshin jumys jasap jatyr. Bul - barlyq qundylyqtardyń ishindegi eń abzaly.
