Elordada «Qazaqstan halqy Assambleıasy: tarıhı ocherk» atty kitaptyń tusaýy kesildi
ASTANA. Shildeniń 2-si. QazAqparat /Marlan Jıembaı/ - Búgin QR Ulttyq akademııalyq kitaphanasynda Qazaqstan halqy Assambleıasynyń janyndaǵy Ǵylymı-saraptyq keńes ázirlegen «Qazaqstan halqy Assambleıasy: tarıhı ocherk» atty kitap oqyrman qolyna tıdi.
«Bul kitaptyń máni de maǵynasy da Assambleıaǵa arnalǵan. Qazaqstan bir kúnde kópultty memleket bolyp qurylǵan joq», dep atap ótken QHA Tóraǵasynyń orynbasary - Hatshylyq meńgerýshisi Eraly Toǵjanovtyń aıtýynsha,, monografııada elimizdiń qalyptasýy, 19 ǵasyrdan bastap qazaq dalasyndaǵy úlken oqıǵalar, onyń ishinde halyqtyń sanyna baılanysty ózgerister qalaı, qandaı turǵyda júrgizildi, qandaı saıası astary boldy degen kóptegen máseler kóterilip, kóp ultty Qazaqstan degen bir sózdiń aıasynda qandaı tereń maǵyna jatqandyǵy týrasynda oılar qozǵalǵan.
«Búgingi jastar men bolashaqtaǵy elimiz jalpy osy kópultty Qazaqstannyń qandaı deńgeıde, qalaı qalyptasqandyǵy jóninde bilgendigi mańyzdy. Óıtkeni ǵylymı ortada, ásirese bilim salasynda ártúrli úrdister ótip jatyr», degen E.Toǵjanov saıası qýǵyn-súrgin jyldarynda elimizge 62 ult ókilderiniń jer aýdarylǵandyǵyn da atap ótti.
QHA Tóraǵasynyń orynbasary - Hatshylyq meńgerýshisiniń aıtýyna qaraǵanda, atalǵan eńbektiń qundylyǵy - barlyq oqıǵalar tarıhı turǵyda baǵalanǵan, sondaı-aq avtorlar táýelsizdikti, ulttyq birlik pen uıysýdy nyǵaıtý úderisteriniń belsendi qatysýshylary bolyp tabylady.
Kitap qazaq, orys jáne aǵylshyn tilderinde 2000 dana taralymmen jaryqqa shyqty.
