Elordada «Qazaqstan - EQYU: tarıhtyń kóshbasshylyq kezeńi» atty kitap kórmesi ashyldy
ASTANA. 18 qarasha. QazAqparat /Marlan Jıembaı/ - Búgin QR Ulttyq akademııalyq kitaphanasynda «Qazaqstan - EQYU: tarıhtyń kóshbasshylyq kezeńi» atty kitap kórmesiniń ashylý rásimi ótti.
Atalǵan taqyryppen uıymdastyrylǵan kórmege qoıylǵan kitaptar memlekettiń nyǵaıýy, halyqtyń birtutastyǵynyń saqtalýy, jańarýdyń údemeli strategııasynyń júzege asýy, qazirgi naryqtyq ekonomıkanyń qurylýy nátıjesindegi qazaqstandyq damý joldary týraly baıandaıdy. Al bul nátıjeler elimizdiń damyǵan álem elderimen tyǵyz baılanys ornatýmen qatar TMD elderiniń arasynan alǵash ret EQYU-ǵa tóraǵalyq jasaý múmkindigin berip otyr.
«Bul kórme Qazaqstannyń EQYU-daǵy tóraǵalyǵyna arnalǵan. Elimizdiń osynaý bedeldi uıymǵa basshylyq jasaýy - demokratııalyq damý máseleleri men adam quqyǵyn qorǵaýda bizdiń respýblıkamyzdyń qol jetkizgen tabystarynyń moıyndalýy. Qazaqstan bedeldi uıymǵa tóraǵalyq ete otyryp, birqatar qyzyqty bastamalarǵa uıytqy boldy jáne oryn alyp jatqan qaqtyǵystardy sheshýge de zor úlesin qosty», - deıdi Memleket tarıhy ınstıtýtynyń dırektory, tarıh ǵylymynyń kandıdaty Búrkit Aıaǵan.
Kórme «Qazaqstan EQYU-da: sabaqtastyq pen jańarý», «Qazaqstan ıadrolyq qarýsyz álemde», «Jahandaný kezeńindegi ekonomıka», «Ekologııalyq qaýipsizdik: adam men tabıǵattyń úılesimdigi», «Adam - eldiń negizgi baılyǵy» degen 5 bólimnen turady. Sondaı-aq zalda ornatylǵan kompıýterden Qazaqstan, onyń álemdegi saıası úrdistegi róli jáne EQYU-ǵa múshe elder týraly mol maǵlumat alýǵa múmkindik bar.
