Elordada Qazaqstan áıelderi koalıtsııasy quryldy
Osyǵan oraı QazAqparat agenttiginiń baspasóz ortalyǵynda ótken máslıhatta Eńbek jáne halyqty áleýmettik qorǵaý mınıstri Gúlshara Ábdiqalyqova 2010 jyldyń basy Qazaqstan úshin erekshe keń aýqymdy, mazmundy oqıǵalarmen toly bolǵandyǵyn atap ótti. Onyń eń bastysy - Qazaqstannyń Eýropadaǵy qaýipsizdik jáne yntymaqtastyq uıymyna tóraǵalyq etýi ekendigin basa aıtty. «Bizdiń eldiń TMD, Azııa jáne búkil álemdegi túrkitildes qaýymdastyǵynyń ishinen alǵashqy bolyp, sonaý Atlantıkadan Tynyq muhıtyna deıin jaıǵasqan 56 alyp memlekettiń basyn biriktirip otyrǵan bedeldi halyqaralyq uıymǵa tóraǵalyq etýi - árıne, barlyq qazaqstandyqtar úshin maqtanysh jáne úlken jaýapkershilik», dedi mınıstr.
Onyń aıtýynsha, bul halyqaralyq qaýymdastyqtyń Qazaqstan Respýblıkasynyń Prezıdenti N.Nazarbaevtyń saıası baǵytyn moıyndap qabyldaýy. «Elbasynyń bıylǵy jylǵy qańtardyń 29-yndaǵy «Jańa onjyldyq - jańa ekonomıkalyq órleý - Qazaqstannyń jańa múmkindikteri» atty Joldaýy «Qandaı qoǵam ornatyp jatyrmyz? Birneshe jyldan keıin Qazaqstannyń álemdegi orny qandaı bolady?» degen árbir qazaqstandyq azamatty mazalaıtyn suraqtarǵa jaýap beredi», dedi ol.
«Kóp birikse - el bolar, kóp tilegi kól bolar» degen qazaqta maqal bar, el tutas bir maqsatqa birikkende alynbaıtyn qamal bolǵan emes», degen G.Ábdiqalyqova qazaqstandyq qoǵamnyń demokratııalanýyn ármen qaraı jetildirý, áıelderdiń quqyǵy men qyzyǵýshylyqtaryn jan-jaqty qorǵaý men tıimdi qoldaý jáne halyqaralyq qarym-qatynastardy keńeıtý maqsatynda Qazaqstan áıelderi koalıtsııasy qurylyp otyrǵandyǵyn aıtty.
Sonymen, Qazaqstandaǵy Koalıtsııanyń qurylýyna QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy G.Ábdiqalyqova, QR Prezıdenti Ákimshiligi ishki saıasat bólimi meńgerýshisiniń orynbasary A.Ǵalymova, QR Syrtqy ister mınıstrliginiń erekshe tapsyrmalar jónindegi elshisi M.Jarbosynova, Qazaqstan Іsker áıelder qaýymdastyǵynyń prezıdenti R.Sársembaeva, Qazaqstannyń Azamattyq alıansynyń prezıdenti A.Soloveva, Qazaqstannyń kásipker áıelder odaǵynyń tóraıymy M.Qazbekova hanymdar muryndyq boldy.
Koalıtsııaǵa múshe bolý áıelderdiń barlyq kommertsııalyq emes uıymdary, bıznes ókilderi, áıel saıasatkerler úshin ashyq bolmaq.
