Elordada «Qazaqstan arýy-2019» baıqaýy bastaldy
NUR-SULTAN. QazAqparat - Sulýlyq baıqaýynda elimizdiń barlyq óńirinen 32 arý óz baǵyn synaýda, dep habarlaıdy QazAqparat tilshisi.
Osymen 22-shi jyl qatarynan ótip jatqan sulýlyq baıqaýyna bıyl 7 myńnan astam ótinim kelip túsken.
Búginge deıin elimizdiń barlyq óńirinde irikteý kezeńi ótip, aqtyq synǵa 32 qatysýshy tańdalynyp alyndy. Sondaı-aq, olar osyǵan deıin «Sulýlyq pen meıirimdilik» degen uranmen elde bolyp jatqan túrli qaıyrymdylyq, mádenı jáne sporttyq is-sharalarǵa qatysty.
Odan bólek, úmitkerlerdiń qatysýymen jarnamalyq-tanymdyq beınerolıkter toptamasy túsirildi. Qysqa metrajdy fılmde ár aımaqtyń qatysýshysy óz óńiriniń týrıstik múmkindikterin pash etti.
«Baǵalaýshy retinde arýlardyń ishki jáne syrtqy sulýlyǵynyń saı kelgenin qalaımyn. Jáne arýlar halyqqa qyzmet etse eken deımin, óıtkeni ol el arýy ıaǵnı halyqtyń adamy. Odan bólek, árıne ulttyq qundylyqtardy bilgeni jáne saqtaǵany durys. Oǵan ana tilinen bastap salt-dástúr, ádep-ǵuryp bári jatady. Árıne salt-dástúr, ádet-ǵurypty jastar túgili úlkender de bile bermeıdi. Sondyqtanda eń bolmasa habarlary bolsa», - dedi «Qazaqstan arýy - 2019» baıqaýy ádilqazylar alqasynyń tóraıymy Yrza Tursynzada.
Uıymdastyrýshylardyń aıtýynsha baıqaýdyń ádil bolýy men ashyqtyǵyn qamtamasyz etý maqsatynda qazylar alqasy fınalǵa shyǵatyn 5 arýdy tańdaıdy, odan ári qazaqstandyqtardyń onlaın jáne SMS arqyly daýys berýi esepke alynady.
