Elordada «Qazaq órkenıeti jáne Sultan Orazaly» atty ǵylymı-praktıkalyq konferentsııa ótti

Onyń jumysyna QR Mádenıet mınıstri M. Qul-Muhammed, akademık S. Qırabaev, aqyn F. Ońǵarsynova, QR Parlamentiniń depýtattary men JOO-nyń rektorlary men professor-ǵalymdary qatysty.

Konferentsııa barysynda sóz alǵan QR Mádenıet mınıstri Muhtar Qul-Muhammedtiń aıtyp ótkenindeı, Sultan Sháripuly Orazaly ulttyq telejýrnalıstıkanyń alǵashqy qarlyǵashy boldy, onyń negizin qalasqan, áýelgi qıynshylyqtaryn qara nardaı beli qaıyspaı tartqan jandardyń biregeıi.

«Bir ózi ulttyq teledıdardyń tutas mektebin qalyptastyrǵan Sultekeńniń úlken eńbegine biz basymyzdy ıip, rahmetimizdi aıtamyz. Sultan Orazaly tek qana teledıdar salasynda qyzmet istep qana qoıǵan joq, ol teledramatýrgııanyń negizin salǵan adam», - dedi mınıstr.

«Jazǵanyna qarap otyrsaq, Sultekeń ǵylymǵa da túren salǵan adam. Ǵabdol Slanovtyń «Dóń asqanyna» kandıdattyq dıssertatsııa jazdy. Doktorlyq dıssertatsııaǵa bergisiz dúnıe jazyp, odan tutas bir zertteýlerdiń tsıklin jarııalaǵandyǵyn da biz jaqsy bilemiz», - dep atap kórsetti M. Qul-Muhammed mereıtoı ıesine qaratyp aıtqan sózinde.

Sultan Orazaly 300-ge jýyq ádebı stsenarıı, 20 shaqty derekti fılmderdiń jáne 40 shaqty ǵylymı-zertteý maqalalardyń avtory. Ol Ǵabıden Mustafın týraly 30 jyl jınaǵan derekterin jańǵyrtyp, fılm túsirdi. Sondaı-aq onyń Salyq Zımanov, Ǵabıden Mustafın, Tahaýı Ahtanov, Sapar Baıjanov, Qýanysh Sultanov, Ábish Kekilbaev jáne basqa eline eleýli azamattar týraly derekti fılmderi qazaq rýhanııatyna qosylǵan altyn úles bolyp qaldy. Sonymen qatar S. Orazaly «Suhbat », «Halyq qazynasy », «Shuǵyla », «Qymyzhana », «Kezdesý », «Aıtys » habarlaryn alǵash uıymdastyryp, efırge shyǵardy.

S. Orazaly QR Prezıdentiniń «Altyn barys » belgisiniń ıegeri, QR Prezıdenti syılyǵynyń, Qazaqstan Jýrnalıster odaǵy syılyǵynyń jáne Abaı atyndaǵy Halyqaralyq ádebı syılyqtyń laýreaty.