Elordada qazaq mektepteriniń sany artýda
ASTANA. 24 qańtar. QazAqparat - Astana qalasynda 2012-2013 oqý jylynda jalpy bilim beretin mektepter sany 70-ke jetti.
Bul týraly Astana.kz saıtyna Astana qalasynyń Bilim basqarmasynan habarlady.
Bul 2010-2011 oqý jyldarymen salystyrǵanda 4 mektepke artyq. Onyń ishinde qazaq tilinde oqytatyn mektepter sany - 24, 2010-2011 jyldary 20 bolǵan.
Bıylǵy oqý jylynda Astana qalasynda jalpy bilim beretin mektepter sanyna bir mektep qosylyp otyr. Qazaq mektepterinde 2011 jyly - 25 883 oqýshy bolsa, 2012-2013 oqý jylynda 29 523 oqýshyǵa jetip otyr.
Basqarmanyń málimeti boıynsha, 2012-2013 oqý jylynda 24 qazaq mektebi boıynsha 2018 muǵalim jumys isteıdi. 1815 muǵalimniń joǵary pedagogıkalyq, 203-iniń orta kásiptik pedagogıkalyq bilimi bar. 579 muǵalimniń biliktilik sanaty joǵary, 503-i birinshi, 448-i ekinshi sanatqa ıe.
ıAǵnı, Astana qalasynda 2011-2012 oqý jylynda 23 qazaq mektebi bolǵan, ondaǵy oqýshylar sany - 25 883. Bul kórsetkish barlyq oqýshylardyń 33,8 % qurasa, bıylǵy oqý jylynda mektep sany bireýge artyp, oqýshylar sany - 29 523 jetken, ıaǵnı, bul kórsetkish barlyq oqýshylardyń 35,3 % qurap otyr.
Búgingi tańda, qalaǵa syrttan keletin turǵyndardyń kóbeıýine baılanysty mektepterde oryn tapshylyǵy sezilýde. Osyǵan baılanysty aldaǵy ýaqytta qazaq tildi mektepterdi ashý josparda bar, - delingen habarlamada.
