Elordada «Qazaq qyzy» baıqaýy ótti
ASTANA. QazAqparat - «Bolashaqqa baǵdar: rýhanı jańǵyrý» baǵdarlamasyn júzege asyrý maqsatynda «Qazaq qyzy» qalalyq baıqaýy ótti, dep habarlaıdy Astana qalasy ákimdiginiń medıa ortalyǵy.
«Bolashaqqa baǵdar: rýhanı jańǵyrý» baǵdarlamasy aıasynda Astana qalalyq ishki saıasat basqarmasy otbasylyq, mádenı, rýhanı qundylyqtardy nasıhattaýǵa jáne qyz balalardyń mádenı-ádeptilik deńgeıin arttyrýǵa, otbasynda qyz balalardy tárbıeleý boıynsha «Qazaq qyzy» atty qalalyq qyz balalar baıqaýyn ótkizdi.
«Baıqaý Astana qalasy kolledj stýdentteri arasynda ótkizilýde. Baıqaýdyń ereksheligi de sol, tek kolledj stýdentteri ǵana qatysa alady jáne 16 men 22 jas aralyǵyndaǵy boıjetken arýlar», dep atap ótti «Qazaqstan Jastary Konventiniń» JQ dırektorynyń orynbasary Marat Muhamedjanuly.
Sharanyń maqsaty - Elbasynyń «Bolashaqqa baǵdar: rýhanı jańǵyrý» baǵdarlamasyn nasıhattaý. Boıjetken qyzdardyń boıyna qazaq qyzdaryna tán izettilik pen ınabattylyqty qalyptastyrý.
«Elbasy maqalasynda ár ulttyń ulttyq qasıeti bolady delingen. Ana bir qolymen besikti, bir qolymen álemdi terbetedi. Ultty ult etetin sol ulttyń qyzdary, sol sebepti de «Rýhanı jańǵyrý» baǵdarlamasy aıasynda qyzdardyń tárbıesine basa nazar aýdaryp, ult bolashaǵyn oılaýdyń qamy retinde ótkizilip otyr. Eger áıel ana tilinde sóılese, ult ana tilinde sóıleıdi», dep aıtty qoǵam qaıratkeri Orazkúl Asanǵazyqyzy.
Baıqaý tórt kezeńnen turady. Atap aıtsaq: «Men qazaqtyń qyzymyn» tanystyrý, «Ónerli órge júzer» óner kórsetý, «Qyz erkem - kestesimen kórkem» oıý-órnek oıý, «Bilgenge marjan» bilim saıysy. Osy sharanyń aldyńda Astana qalasy ákimdiginiń qoldaýymen kolledj stýdentteriniń arasynda Orazkúl Asanǵazyqyzy «Boıjetken nazaryna» atty lektsııalar oqyǵan. Onda qazaq qyzyna tán tárbıe, ınabattylyq, ıbalylyq, izettilik jaıy sóz bolǵan.
«Shara osymen ekinshi jyl qatarynan ótkizilip otyr. Maqsaty qyzdardyń tárbıesine asa mán berý. Qazaq halqy qyzdarǵa ınabatty, ıbaly, dúnıege urpaq ákeletin ardaqty jan dep qaraıdy. Bizde sol babalar tárbıesin jalǵastyrý oıynda ótkizýdemiz», - dedi ishki saıasat basqarmasy basshysynyń orynbasary Qaırat Qambarov.
Sharaǵa Astana qalasynyń kolledj stýdentteri, ata-analar, kolledj ustazdary qatysty.
